ក្រឡេកមកមើលស្នាដៃស្ថាបត្យកម្មពិសេសប្លែកនៅប្រទេសជប៉ុន

ក្រឡេកមកមើលស្នាដៃស្ថាបត្យកម្មពិសេសប្លែកនៅប្រទេសជប៉ុន។

ក្នុងដំណើរការនគរូបនីយកម្មនៅប្រទេសជប៉ុន អគារខ្ពស់ៗកាន់តែច្រើនឡើង មិនត្រឹមតែមានដង់ស៊ីតេខ្ពស់ប៉ុណ្ណោះទេ ថែមទាំងមានការរចនាប្លែកៗជាច្រើនផងដែរ។ ជាមួយនឹងគោលបំណងមាន “តែមួយគត់” អគារមួយចំនួនត្រូវបានសាងសង់ឡើងដោយមានការរចនាប្លែកដែលធ្វើឲ្យអ្នកទស្សនាភ្ញាក់ផ្អើល។

ក្នុងចំណោមនោះមានកន្លែងមួយមានឈ្មោះត្រឹមត្រូវដែរ ប៉ុន្តែ​ដោយ​សារ​តែ​រូប​រាង​ខាង​ក្រៅរបស់​វា ដូច្នេះឥឡូវនេះអ្នកដំណើរឆ្លងកាត់ទម្លាប់ហៅកន្លែងនោះដោយឈ្មោះមួយផ្សេងទៀត។

ចូរយើងក្រឡេកមកមើលស្នាដៃស្ថាបត្យកម្មពិសេសប្លែកមួយចំនួននៅប្រទេសជប៉ុនតាមរយៈខ្លឹមសារអត្តបទខាងក្រោម។

អគារ Asahi Beer Hall

នេះជារូបភាពអគារ Asahi Beer Hall និងស្នាដៃចម្លាក់ “Asahi Flame” (ឬត្រូវបានគេហៅថា Flamme d’Or) នៅ​ទីក្រុង Tokyo ប្រទេស​​ជប៉ុន។

យើងអាចមើលឃើញអគារនេះនៅពេលដែលដើរជុំវិញតំបន់ Asakusa ទីក្រុង Tokyo ឬនៅពេលដែល​បើក​បរ​លើ​ផ្លូវ​ល្បឿន​លឿន។

នៅជាប់ពីក្រោយជាទីស្នាក់ការកណ្តាលរបស់ Asahi អគារទីស្នាក់ការកណ្តាលមានរាងដូចជាកែវស្រា​បៀរ​​ដែល​ពេញ​ទៅ​ដោយ​ពពុះ។

ស្នាដៃសិល្បៈចម្លាក់មាសដ៏ធំនៅលើអគារដែលអ្នកទាំងអស់គ្នាមើលឃើញត្រូវបានគេហៅថា Asahi Flame ដែលតំណាងឲ្យ “បេះដូងដែលកំពុងឆេះនៃស្រាបៀរ Asahi” និងត្រូវបានបំផុសគំនិត​ដោយ​អណ្តាត​ភ្លើង​អូឡាំពិក។ ទោះជាយ៉ាងណា រូបរាងដ៏ស្រពេចស្រពិលរបស់រូបចម្លាក់នេះបាន​ធ្វើ​ឲ្យ​អ្នក​ស្រុក និង​ភ្ញៀវទេសចរណ៍មានការភ័ន្តច្រឡំ ដែលបណ្តាលឲ្យគ្រប់គ្នាដាក់រហស្សនាម​ថា “Golden Turd” មាន​ន័យ​ថា “ដុំលាមក​មាស” ។

ឥឡូវនេះអ្នកទាំងអស់គ្នាបានដឹងច្បាស់ហើយ ដូច្នេះសូមកុំហៅថា “ដុំលាមក” ទៀតអី។ អ្នកដែលបង្កើត​ស្នាដៃ​នេះ​ប្រាកដ​ជា​មិន​សប្បាយ​ចិត្ត​​ទេ​នៅ​ពេល​​ដែល​​ឮ​​បែប​​នេះ។

Tokyo Big Sight

Tokyo Big Sight ដែលមានឈ្មោះជាផ្លូវការហៅថាមជ្ឈមណ្ឌលពិព័រណ៍អន្តរជាតិ Tokyo គឺជាមជ្ឈ​មណ្ឌល​សន្និបាតធំបំផុតនៅប្រទេសជប៉ុន។

មជ្ឈ​មណ្ឌល​នេះ​ត្រូវ​បាន​សាង​សង់​ឡើង​ដោយ​ស្ថាបត្យកម្មពិសេស ក្នុងនោះចំណុចដែលលេចធ្លោបំផុត​គឺ​ប៉ម​សន្និបាត​ដែល​មាន​ត្រីកោណ​ដាក់​បញ្ច្រាស​ចំនួន​បួន​ខាង​លើ ដែលបង្កើតបានជាស្ថាបត្យ​កម្ម​ដ៏​គួរ​ឲ្យ​ចាប់​អារម្មណ៍ និង​​ងាយ​​ស្រួល​កត់​​សម្គាល់។

នៅកន្លែងនេះតែងតែរៀបចំសន្និសីទជាច្រើន ការ​តាំងពិពណ៌ និងព្រឹត្តិការណ៍សំខាន់ៗ រួមទាំងព្រឹត្តិ​ការណ៍​ល្បី​ដូច​ជា Comiket, Anime Japan, Tokyo Motor Show និង Design Festa ។

នេះជាកន្លែងដែលយើងមិនអាចច្រឡំនឹងកន្លែងផ្សេងទៀតឡើយ ដោយសារតែការរចនាមានលក្ខណៈ​ពិសេស​ប្លែក។

រោងចក្រកែច្នៃកាកសំណល់ Maishima

អគារ​ក្នុង​រូបភាព​គឺ​រោងចក្រ​កែច្នៃ​កាកសំណល់ Maishima (Maishima Incineration Plant) ដែល​​ត្រូវ​​បាន​​គេ​ហៅ​ថា​រោង​ចក្រ​ Maishima ស្ថិត​នៅ​ទីក្រុង Osaka ប្រទេស​ជប៉ុន។

រោងចក្រ Maishima ល្បីថាជាកន្លែងដែលមានស្ថាបត្យកម្មពិសេស និងចម្រុះពណ៌ ដែល​ត្រូវបានរចនា​ឡើង​ដោយ​ជន​ជាតិ​អូទ្រីស Friedensreich Hundertwasser ជាបុគ្គលដែលល្បីឈ្មោះ​ថា​ស្ថាបត្យ​កម្ម​ដែល​មិន​ប៉ះ​ពាល់​ដល់​បរិស្ថាន។

នេះជារោងចក្រកែច្នៃសំរាម ប៉ុន្តែការរចនានេះក្នុងគោលបំណងលុបបំបាត់រូបភាពអវិជ្ជមានដែល​ទាក់​ទង​នឹង​កន្លែង​កែ​ច្នៃ​សំរាម ហើយ​ប្រែ​ក្លាយ​វា​ទៅ​ជា​កន្លែង​ទាក់​ទាញ​ទេសចរណ៍។

ជាមួយនឹងរូបរាងខាងក្រៅដ៏គួរឲ្យចាប់អារម្មណ៍ រោងចក្របានក្លាយទៅជាកន្លែងទាក់ទាញភ្ញៀវទេស​ចរណ៍​ក្នុង​ស្រុក និង​ក្រៅ​ប្រទេស ជា​ពិសេស​អ្នក​ដែល​ស្រលាញ់​ចូល​ចិត្ត​ស្ថាបត្យកម្ម និងសិល្បៈ។

Gate Tower Building

អគារក្នុងរូបភាពគឺ Gate Tower Building នៅទីក្រុង Osaka ប្រទេសជប៉ុន ដែលល្បីថាមានផ្លូវល្បឿន​លឿន​ធ្វើ​ដំណើរ​ឆ្លង​កាត់​អគារ។

Gate Tower គឺជាអគារការិយាល័យដែលមានចំនួន ១៦ ជាន់ស្ថិតនៅសង្កាត់ Fukushima ទីក្រុង Osaka ។

លក្ខណៈពិសេសរបស់អគារគឺផ្លូវល្បឿនលឿន Hanshin Expressway ដែលធ្វើដំណើរឆ្លងកាត់ជាន់​ទី ៥, ៦ និងទី ៧ ។

ការសាងសង់អគារ និងផ្លូវល្បឿនលឿនត្រូវបានធ្វើឡើងក្រោមកិច្ចព្រមព្រៀងពិសេស ក្នុងនោះរចនា​សម្ព័ន្ធ​ជុំវិញ​ផ្លូវត្រូវបានរចនាឡើងដើម្បីការពាររំញ័រ និងសំឡេងរំខានរបស់មធ្យោបាយដឹកជញ្ជូនកុំឲ្យ​ប៉ះ​ពាល់​ដល់​អគារ។

អគារនេះថែមទាំងត្រូវបានគេហៅថា “សំបុកឃ្មុំ” ដោយសារ​រូបរាង​របស់​វា និង​មធ្យោបាយធ្វើដំណើរ​ឆ្លង​កាត់។

ព្រះវិហារ St. Mary

នេះជាព្រះវិហារ St. Mary (ឬត្រូវបានគេហៅថាព្រះវិហារ Tokyo នៃតំបន់សាសនាកាតូលិករ៉ូម៉ាំង) នៅ​ទីក្រុង Tokyo ប្រទេស​ជប៉ុន។

អគារទំនើបនេះត្រូវបានរចនាឡើងដោយស្ថាបត្យករដ៏ល្បីឈ្មោះ Kenzo Tange ហើយ​បញ្ចប់​នៅឆ្នាំ ១៩៦៤ ។

ដំបូងឡើយ ព្រះវិហារត្រូវបានសាងសង់ឡើងពីឈើក្នុងឆ្នាំ ១៨៩៩ ប៉ុន្តែត្រូវបានបំផ្លាញកំឡុងសង្គ្រាម​លោក​លើក​ទីពីរ។

ការរចនារបស់ស្ថាបត្យករ Tange គឺជាការរួមបញ្ចូលគ្នារវាងរចនាប័ទ្មទំនើប និងការផ្លាស់ប្តូរ ជា​មួយ​នឹង parabol hyperbol ចំនួន​ប្រាំបីបង្កើតបាន​ជា​ឈើ​ឆ្កាង​ពន្លឺ​នៅ​លើ​ដំបូល។

សម្ភារៈសំខាន់ដែលគេប្រើគឺបេតុង ដែកអុីណុក និងថ្មម៉ាបអុីតាលី បង្កើតបានជារូបរាងខាងក្រៅ​ភ្លឺ​ចែង​ចាំង និង​ទំនើប។

ព្រះវិហារ St. Mary គឺជាមជ្ឈមណ្ឌលសាសនានៅប្រទេសជប៉ុន ហើយជាកន្លែងរៀបចំព្រឹត្តិការណ៍ និង​ការ​ប្រជុំ​សាសនា។

អាចនិយាយបានថា ប្រទេសជប៉ុនជាទឹកដីដែល​មាន​ស្នាដៃ​ស្ថាបត្យកម្ម​ពិសេសប្លែកជាច្រើន ក្នុងនោះអគារដែលគួរឲ្យចាប់អារម្មណ៍បំផុតប្រហែលជាអគារ Asahi Beer Hall ដែលត្រូវបានរំលឹកនៅដើម​អត្តបទ។

និយាយអញ្ចឹងខ្ញុំស្រាប់តែនឹកឃើញថា នៅខាងក្នុងអគារ Asahi Beer Hall មានភោជនីយដ្ឋានលក់ស្រាបៀរ គួបផ្សំនឹងម្ហូបក្លែមដ៏ឈ្ងុយឆ្ងាញ់។ ស្រាបៀរស្រស់ត្រូវបានដឹកជញ្ជូនពីរោងចក្រជារៀង​រាល់​ថ្ងៃ ដូច្នេះនៅពេលដែលមកដល់ទីនេះ ធានាថាអ្នកទាំងអស់គ្នាអាចផឹកស្រាបៀរដែលស្រស់​បំផុត។

ប្រសិនបើមានឱកាសបានទៅលេង Asakusa អ្នក​ប្រាកដ​ជា​សោក​ស្តាយ​ប្រសិន​បើ​រំលង​កន្លែងនេះ។

Abe Kengo