កំពូល​បុគ្គល​ដ៏​អស្ចារ្យ Oyama Masutatsu ​ជា​ស្ថាបនិកនៃ​ក្បាច់​គុន Kyokushin Kaikan

កំពូលបុគ្គលដ៏អស្ចារ្យ Oyama Masutatsu ជាស្ថាបនិកនៃ​ក្បាច់​គុន Kyokushin Kaikan ។

លោក Oyama Masutatsu ដែល​គេ​តែង​តែ​ហៅ​កាត់ថា Mas Oyama គឺ​ជា​ស្ថាបនិក​ក្បាច់​គុន Kyokushin ជាផ្នែកមួយនៃការ៉ាតេដែល​មិន​ត្រឹម​តែ​មាន​ឥទ្ធិពល ថែម​ទាំង​អាច​អនុវត្ត​ជាក់ស្តែង ហើយនៅភាគខាងលិចគេហៅថា Full Contact Karate ។ ដោយមិនត្រឹមតែត្រូវបានគេចាត់​ទុក​ជា​បុគ្គល​ដែល​ពូកែក្នុងពិភពក្បាច់​គុន​ជប៉ុន ដៃ​ទទេ​សម្លាប់​គោ​ជល់​ប៉ុណ្ណោះ​ទេ លោក Oyama ក៏ល្បីថា ជាមនុស្សដែលមិនធ្លាប់​​បដិសេធ​ការ​ប្រកួត​ណា​មួយ​ឡើយ។

លោក Oyama កើតឆ្នាំ ១៩២៣ នៅ Gimje ខេត្ត Jeollabuk-do (North Jeolla) កូរ៉េ​ខាង​ត្បូង ក្នុង​​កំឡុង​ពេល​ដែល​តំបន់​នេះស្ថិតក្រោមការគ្រប់គ្រង​របស់​ចក្រ​ភព​ជប៉ុន។ លោកជាបុគ្គលដែល​មាន​ដើមកំណើត​កូរ៉េ ប៉ុន្តែក្នុងនាមជា​ពលរដ្ឋ​ជប៉ុន ក្រោយ​មក​បាន​ក្លាយ​ជា​ពលរដ្ឋ​កូរ៉េ ហើយ​ត្រឡប់​ទៅសញ្ជាតិ​​ជប៉ុន​​វិញ។

កាលពីមុន អ្នកហាត់ការ៉ាតេនឹងអនុវត្តគោលការណ៍ “sundome” (寸止め) ដែលជាគោលការណ៍សំខាន់មួយ។ គោលការណ៍នេះតម្រូវអ្នកហាត់ត្រូវរក្សាគម្លាតជាក់លាក់នៅពេលដែលបញ្ចេញក្បាច់ មិន​អនុញ្ញាត​ឲ្យ​ប៉ះ ឬគ្រាន់តែប៉ះគូប្រកួតបន្តិចពេលប្រកួត ឬហ្វឹកហាត់​នោះ​ទេ ម្យ៉ាង​វិញ​ទៀត ត្រូវ​​គ្រប់​​គ្រង​​កម្លាំង​​វាយ​ប្រហារ​ក្នុងកម្រិតសមល្មម មិនប្រើកម្លាំងទាំងអស់ដូចក្បាច់គុនផ្សេងទៀត​ឡើយ។ ទោះជាយ៉ាងណា ក្បាច់គុន Kyokushin Kaikan ដែលលោក Oyama ផ្តួចផ្តើមបែរជាតម្រូវ​ឲ្យ​​អ្នក​​ហាត់​​ប្រើ​​កម្លាំង​​ទាំង​​អស់។

លោក Oyama បានបង្កើតក្បាច់គុនថ្មី ជាមួយនឹងក្បាច់ប្រយុទ្ធយ៉ាងសាហាវ និងខ្លាំងក្លា កែលម្អការវាយប្រហារតាមរយៈការប្រើកណ្តាប់ដៃ និង​ជើង​មក​លើគូប្រកួត​ផ្ទាល់។

នៅលើភ្នំរយៈពេល ១៨ ខែ

នៅឆ្នាំ ១៩៤៦ ដោយមិនខ្វល់ពីពាក្យសម្តីរបស់សាច់ញាតិ និងមិត្តភក្តិ លោក Oyama បានសម្រេច​​ចិត្ត​​ឡើង​​ទៅ​​កាន់​​ភ្នំ Minobu ក្នុងខេត្ត Chiba ដើម្បីហ្វឹកហាត់។

នៅលើកំពូលភ្នំខ្ពស់គ្មានស្រមោលមនុស្សម្នាក់ ហើយក៏មិនមាន​ការ​ឧបត្ថម្ភ​ធន​ណា​មួយដែរ លោក Oyama ត្រូវពឹងលើខ្លួនឯង គេនិយាយថា លោកបានប្រយុទ្ធជាមួយនឹងសត្វព្រៃនៅលើភ្នំដើម្បី​ស្វែង​រក​អាហារ។ ក្រោយរយៈពេល ១៨ ខែហ្វឹកហាត់ទាំងផ្លូវកាយ និងស្មារតី លោក Oyama បាន​ចុះ​ពី​ភ្នំ ហើយ​បន្សល់​ទុក​នូវ​កំពូល​រឿង​រ៉ាវ​ដល់មនុស្ស​ជំនាន់ក្រោយ។

អព្ភូតហេតុសម្លាប់គោដោយដៃទទេ

នៅឆ្នាំ ១៩៥០ លោក Oyama បានចុះពីលើភ្នំ ហើយ​ប្រយុទ្ធ​ស្លាប់​​រស់​ជាមួយនឹងគោជល់មួយក្បាល​ទម្ងន់ ៤៥០ គីឡូក្រាមដោយដៃទទេ។ ដំបូងស្តាប់ទៅដូចជាសត្វ​កណ្តូបប្រយុទ្ធនឹងសត្វដែលធំ​ជាង ប៉ុន្តែ​ជាក់​ស្តែង​គឺ​ផ្ទុយ​ទៅ​វិញ។ មិនត្រឹមតែអាចទប់ទល់នឹងការវាយប្រហាររបស់គោជល់ដ៏ខ្លាំងមួយក្បាលប៉ុណ្ណោះទេ លោក Oyama ថែមទាំងកាច់បាក់ស្នែងរបស់វា ហើយទទួលបានជ័យ​ជំនះ​ដ៏​អស្ចារ្យ។

ហើយចាប់តាំងពីពេលនោះ លោក Oyama បានក្លាយជាកំពូលបុរសដ៏អស្ចារ្យ សម្លាប់គោជល់ចំនួន ៤៧ ក្បាលដោយដៃទទេ ក្នុងចំណោមនោះមាន ៤ ក្បាលស្លាប់ភ្លាមៗ ហើយប៉ុន្មានក្បាលផ្សេង​ទៀត​បាក់​ស្នែង​ដោយ​សារ​កណ្តាប់​ដៃ។

ពិតជាគួរឲ្យអាណិតគោជល់ដែលសំណាងអាក្រក់ទាំងអស់នោះណាស់។

ការប្រកួតដ៏គួរឲ្យចាប់អារម្មណ៍នៅសហរដ្ឋអាមេរិក

នៅឆ្នាំ ១៩៥២ លោក Oyama Masutatsu បានធ្វើដំណើរទៅកាន់អាមេរិក ហើយទទួលយកការប្រយុទ្ធបន្តផ្ទាល់នៅលើកញ្ចក់ទូរទស្សន៍ចំនួន ៧ ការប្រកួត ដោយបានយកឈ្នះទាំងស្រុង ដោយមិន​ខ្វល់​ពី​មាឌ​ធំ​របស់​គូប្រកួត​នោះ​ទេ។

ពត់កោងប្រាក់កាក់ ១០ យ៉េន

ប្រហែលជាអ្នកទាំងអស់គ្នាធ្លាប់មើលឃើញប្រាក់កាក់ ប៉ុន្តែតើប្រិយមិត្តធ្លាប់ឃើញគេប្រើ​ដៃ​ពត់​កោងប្រាក់​កាក់​ដែរ​ទេ? ប្រាក់កាក់ត្រូវបានធ្វើឡើងពីទង់ដែកមានលក្ខណៈរឹង ម្យ៉ាងវិញទៀត មានទំហំតូច ដូច្នេះ​​ប្រសិន​​បើ​​ចង់​ប្រើ​កម្លាំង​ពត់​កោង​ប្រាក់​កាក់ ត្រឹម​តែ​អាច​ប្រើ​ម្រាមដៃប៉ុណ្ណោះ​។ ស្តាប់ទៅដូចជា​មិន​សម​ហេតុ​ផល ប៉ុន្តែ​លោក Oyama ពិត​ជា​បានធ្វើរឿងនេះ។

ធម្មតាកម្លាំងក្តាប់របស់បុរសពេញវ័យម្នាក់ប្រហែល ៥០ គីឡូក្រាម ប៉ុន្តែសម្រាប់លោក Oyama មានទម្ងន់ជាង ១២០ គីឡូក្រាម។

ខ្ញុំជឿថា មានមនុស្សមិនច្រើនទេដែលអាចធ្វើបានដូចជាលោក Oyama ប៉ុន្តែមិនថាមានសមត្ថភាព​នោះ​ពិត​ឬអត់ទេ សកម្មភាពពត់កោងប្រាក់កាក់ជាទង្វើបង្ខូចទ្រង់ទ្រាយរូបិយ​ប័ណ្ណ ដូច្នេះខ្ញុំសង្ឃឹម​ថា អ្នក​ទាំង​អស់​គ្នា​នឹងមិនធ្វើតាម​នោះ​ទេ។

កាត់ដបស្រាបៀរដោយប្រើដៃ

បន្ទាប់ពីសម្តែងក្បាច់ shuto កាត់ដបស្រាបៀរ និងស្រាវីស្គីដែលតម្រៀបបញ្ឈរ ដោយ​ផ្នែកខាងក្រោមដបមិនធ្លាក់ លោក Oyama ត្រូវ​បាន​សាធារណៈ​ជន​អាមេរិក​ដាក់​រហស្សនា​ថា “god hand” (កំពូលកណ្តាប់ដៃ) ។

មិនមែនធ្វើឲ្យបែកនោះទេ ប៉ុន្តែលោក Oyama បានប្រើកម្លាំងដៃ ពោលគឺម្រាមដៃ ហើយកាត់ផ្តាច់​ដប​កែវ​រឹង​ជា​ពីរ។

នេះ​ជា​អ្វី​ដែល​អ្នក​ដទៃ​មិន​អាច​ធ្វើ​បាន។

លោតឆ្លងកាត់រថយន្ត

សម្រាប់លោក Oyama ការហ្វឹកហ្វឺនមិនត្រឹមតែផ្តោតលើកម្លាំងប៉ុណ្ណោះទេ ទន្ទឹមនឹងនោះ ល្បឿនក៏​សំខាន់​ណាស់​ដែរ ហើយលោកបានប្រើរថយន្តធ្វើជាវត្ថុហ្វឹកហាត់របស់ខ្លួន។ លោកបានរត់ឆ្ពោះទៅ​កាន់​រថយន្ត​ដែល​កំពុង​ចត ហើយ​លោត​ឆ្លងកាត់រថយន្ត។

រថយន្តមានច្រើនទំហំ ប៉ុន្តែរថយន្តធម្មតានៅពេលនោះមានប្រវែងជាង ៤ ម៉ែត្រ និងកម្ពស់ជាង ១,៥ ម៉ែត្រ ជា​មួយ​នឹង​រថយន្ត​ដែល​មាន​កម្ពស់​បែប​នេះ សូម្បីតែកីឡាករលោតចម្ងាយអូឡាំពិកក៏ពិបាក​លោត​ផុត​ដែរ។

លោក Oyama ជាអ្នកដែលបានចូលរួមចំណែកយ៉ាងធំធេងចំពោះការបង្កើតក្បាច់គុន Kyokushin Kaikan ។ បន្ទាប់​ពី​បាន​បង្កើត​សាលា​ក្បាច់​គុន សាលា​ក្បាច់​គុន​នេះ​បាន​ទាក់​ទាញសិស្សជាង ១២ លាននាក់មកពី ១២០ ប្រទេសជុំវិញពិភពលោក។ ភាគ​ច្រើន​អ្នកដែល​តាម​ហាត់ក្បាច់គុននេះសុទ្ធតែប្រាថ្នាចង់​បន្សល់​ទុក​នូវ​ស្នាដៃដូច​ជា​គ្រូរបស់ខ្លួនលោក Mas Oyama ។

នៅលើពិភពលោកមានក្បាច់​គុន​ជា​ច្រើន ក្បាច់​គុន​នីមួយៗ​មាន​ចំណុច​ខ្លាំងដោយឡែក ជា​មួយនឹង​បុគ្គល​ល្បី​ឈ្មោះ​មួយ​ចំនួន នៅ​ពេល​ដែល​រំលឹកដល់បុគ្គលដែលល្បីឈ្មោះទាំងនោះ យើងប្រាកដ​ជា​នឹកឃើញស្នាដៃដែលពួកគេបន្សល់ទុក។ ដូច​ជា​រំលឹក​ដល់ Kyokushin Kaikan យើង​នឹក​ឃើញភ្លាម​ដល់​លោក Oyama Masutatsu ។

Abe Kengo