គ្រឿងបរិក្ខារក្នុង “ឡានបោះជំរុំ” នៅប្រទេសជប៉ុន

គ្រឿងបរិក្ខារក្នុង “ឡានបោះជំរុំ” នៅប្រទេសជប៉ុន។

អំឡុងពេល ៣០ ឆ្នាំមកហើយ ប្រទេសជប៉ុនបានឆ្លងកាត់វិបត្តិសេដ្ឋកិច្ច។ រហូត​​មក​​ដល់​​ពេល​​នេះនៅ​តែ​មើល​មិន​ឃើញ​លទ្ធផល ហើយ​​មិន​​ដឹង​​ថា​​អនាគត​​ប្រទេស​​នេះ​នឹង​ទៅ​ជាយ៉ាងណា។

ដោយសារឥទ្ធិពលសេដ្ឋកិច្ច សម្រាប់មនុស្សជាច្រើន ការធ្វើដំណើរកម្សាន្តបានក្លាយជាក្តីស្រមៃដែល​មិន​អាច​សម្រេច​បាន។ ក្នុងស្ថានភាពនេះ ប្រភេទមធ្យោបាយធ្វើដំណើរថ្មីត្រូវបានបង្កើតឡើង និង​កាន់​តែ​ពេញ​និយម។ ដែលធ្វើឲ្យក្តីស្រមៃធ្វើដំណើរកម្សាន្ត​របស់​មនុស្ស​ជា​ច្រើន​ក្លាយ​ជាការ​ពិត។

យានជំនិះប្រភេទនេះមានឈ្មោះហៅច្រើន ដូចជារថយន្តបោះជំរុំ ឡានធ្វើដំណើរកម្សាន្ត ក្នុងភាសា​អង់គ្លេស​ហៅ​ថា camping car, mobihome ឬរថយន្ត RV (Recreational Vehicle) ។ នេះជាប្រភេទយានជំនិះដែលត្រូវបានរចនាឡើងដូចជាផ្ទះចល័ត ដែលរួមបញ្ចូលកន្លែងរស់នៅ និងគ្រឿង​បរិក្ខារ​ផ្សេងៗ។

ប្រសិនបើអ្នកទាំងអស់គ្នាមិនធ្លាប់ប្រើយានជំនិះប្រភេទនេះ ខ្ញុំប្រាកដថា គ្រឿង​បរិក្ខារ​ក្នុង​រថយ​ន្ត​អាច​នឹងច្រើន​ជាង​អ្វី​ដែល​អ្នក​កំពុង​ស្រមៃ​គិត​ទៅ​ទៀត។

នៅខាងក្នុងរថយន្តត្រូវ​បាន​បំពាក់​ដោយ​តុ និង​កៅអី ដូច្នេះអ្នកដំណើរអាចប្រើធ្វើជាតុសម្រាប់បរិភោគ​អាហារ។ នៅ​ប្រទេស​ជប៉ុន សូម្បី​តែ​នៅ​តំបន់​ជន​បទ​ក៏​មាន​ម៉ាត​លក់​ទំនិញ​ផង​ដែរ អ្នកដំណើរ​អាច​ឈាន​ចូល​ហាង​ទិញ​ទំនិញ ហើយអាចបរិភោគអាហារនៅលើឡានគ្រប់ពេល ជា​មួយ​នឹង​ម៉ាសុីន​ត្រជាក់​នៅ​ក្នុង​ឡាន។

សម្រាប់​យាន​ជំនិះ​ប្រភេទ​ធំ​ថែម​ទាំង​មានផ្ទះបាយទៀតផង ប្រសិនបើអ្នកបារម្ភថា មិនទម្លាប់នឹង​ម្ហូបអាហារនៅកន្លែងដែលខ្លួន​ទៅ​ដល់​នោះ អ្នកដំណើរអាច​ចម្អិន​អាហារ​ដោយ​សេរី​នៅលើ​ឡាន អាច​ធានាពី​តម្រូវការ និង​រស​ជាតិ។

សម្រាប់ម៉ូដែលរថយន្តជាច្រើនផ្សេងទៀត តុកៅអីអាចបត់បាន ឬពង្រីកធំដើម្បីធ្វើជាក្រែគេង។ ចំណុចនេះធានាថា អ្នកដំណើរអាចគេងដាក់ជើងត្រង់បានយ៉ាងស្រួល ដោយបំបាត់គំនិត​​ដែល​​ថា​ត្រូវ​គេង​ពត់​ជើង​នៅ​លើ​រថយន្ត។

អំឡុងពេលគេង ម៉ាស៊ីនត្រជាក់ក្នុងរថយន្តនៅតែអាចបើកបាន ប៉ុន្តែត្រូវបើកដំណើរការម៉ាសុីនរបស់រថយន្តជានិច្ច (មិនអាចបិទម៉ាស៊ីនរថយន្ត) ដូច​​នឹង​រថយន្ត​ធម្មតា​ផ្សេង​ទៀតដែរ។ ទោះជាយ៉ាង​ណា គុណវិបត្តិត្រង់ថា មានមនុស្សមួយចំនួនមិនចូលចិត្តសំឡេងរំខានដែលចេញពីម៉ាសុីនរបស់រថយន្ត ដូច្នេះទើបនៅលើរថយន្តមួយចំនួន គេ​បំពាក់​ម៉ាស៊ីន​ត្រជាក់ និងទូទឹក​កក​ដែលប្រើ​ថ្ម​បម្រុង។ បរិយាកាសនៅខាងក្នុងរថយន្តតូចចង្អៀត ដូច្នេះឧបករណ៍ទាំងនេះ​ល្មម​អាច​ធ្វើឲ្យត្រជាក់​បាន។

គ្រឿងអេឡិចត្រូនិចផ្សេងទៀតដូចជា មីក្រូវ៉េវ ទូរទស្សន៍ ឧបករណ៍សាកថ្មទូរស័ព្ទ និង WiFi សុទ្ធតែប្រើថ្មបម្រុងទាំងអស់ ដូច្នេះនៅលើរថយន្តមានឧបករណ៍គ្រប់យ៉ាងប្រៀបដូចជាបន្ទប់សណ្ឋាគារតូចមួយ។

ប្រសិនបើអ្នកចង់បានភាពឯកជន មិនចង់ឲ្យនរណាម្នាក់មើលឃើញផ្នែកខាងក្នុងរថយន្ត គ្រាន់​តែ​ដាក់​បន្ថែមវាំងននទៅបានហើយ។

អាស្រ័យលើតម្រូវការរបស់អ្នកដំណើរ រថយន្តមួយចំនួនត្រូវបានបំពាក់ដោយគ្រឿងបរិក្ខារទំនើប។

យ៉ាងណាមិញ ទោះបីជាមានគ្រឿងបរិក្ខារគ្រប់គ្រាន់ ប៉ុន្តែមានចំណុចមួយចំនួនត្រូវកត់សម្គាល់ទាក់​ទង​នឹង​បង្គន់ និង​បន្ទប់​ទឹក។

ចំពោះយានជំនិះប្រភេទធំមានបំពាក់បង្គន់ និងកន្លែងងូតទឹកគ្រប់គ្រាន់ ទោះបីជាមានគ្រឿងបរិក្ខារគ្រប់គ្រាន់ ប៉ុន្តែតម្លៃក៏ថ្លៃណាស់ដែរ ហើយ​ការ​ជូត​សម្អាត​បន្ទាប់​ពី​ប្រើ​ប្រាស់​ក៏​ហត់​ណាស់ដែរ។

នៅពេលដែលប្រឈមនឹងស្ថានភាពបែបនេះ អ្នកប្រើប្រាស់រថយន្តបោះជំរុំនៅជប៉ុនបានជ្រើសយកមធ្យោបាយដែលងាយស្រួលជាង នោះគឺងូតទឹកនៅបន្ទប់ទឹកសាធារណៈ ឬកន្លែងត្រាំជ្រោះទឹកក្តៅ។ បើប្រៀបនឹងការងូតទឹកនៅលើរថយន្ត ប្រហែលជាការងូតទឹកនៅកន្លែងសាធារណៈ​ជា​ជម្រើស​ដែល​ងាយ​ស្រួល​ជាង។

បញ្ហាមួយផ្សេងទៀតគឺបង្គន់ ភាគច្រើនឧទ្យានធំៗនៅជប៉ុនសុទ្ធតែមានបង្គន់សាធារណៈដែលអាចប្រើប្រាស់បានដោយសេរី ហើយកន្លែងទាំងនោះភាគច្រើនមានអនាម័យល្អ។ ក្រៅពីប្រើបង្គន់​នៅ​តាម​សួន​ច្បារ អ្នកក៏អាចប្រើបង្គន់នៅតាមម៉ាតផងដែរ។ អ្នកអាចឈានចូលទិញអាហារ ឬភេសជ្ជៈ​មួយ​ចំនួន ហើយឆ្លៀតសុំប្រើបង្គន់។ ហើយជាការពិតណាស់ បង្គន់នៅកន្លែងទាំងនេះក៏មាន​អនាម័យ​ណាស់​ដែរ។

យើងអាចមើលឃើញថា បន្ទាប់ពីរកឃើញដំណោះស្រាយមួយចំនួនទាក់ទងនឹងបញ្ហាអនាម័យផ្ទាល់​ខ្លួន ការ​ប្រើ​ប្រាស់​​រថយន្ត​​បោះ​ជំរុំ​សម្រាប់​ធ្វើ​ដំណើរ​មានលក្ខណៈងាយស្រួលជាង។ ម្យ៉ាងវិញទៀត ទាក់​ទង​នឹង​បញ្ហា​សុវត្ថិភាព​នៅ​ប្រទេស​ជប៉ុន គឺមិនចាំបាច់ព្រួយបារម្ភក្នុងអំឡុងពេលធ្វើ​ដំណើរ​​ផ្សង​​ព្រេង​​ឡើយ។

ទោះបីជាដំបូងត្រូវចំណាយប្រាក់ជួលរថយន្ត ប៉ុន្តែបន្ទាប់មកអាចសន្សំសំចៃបានយ៉ាងច្រើន។

តើប្រិយមិត្តចង់ផ្លាស់ប្តូរការធ្វើដំណើររបស់ខ្លួន​តាម​រយៈ​ការ​ជ្រើស​យក​រថយន្ត​បោះជំរុំ​បែប​នេះដែរ​ទេ?

សព្វថ្ងៃនេះ នៅប្រទេសជប៉ុនមានកន្លែងជួលរថយន្តបោះជំរុំច្រើនណាស់។ ដូច្នេះមិនពិបាកនោះទេ អ្នកទាំងអស់គ្នាអាចទទួលយកបទពិសោធន៍ដំណើរកម្សាន្តដ៏ពិសេស ដោយនាំមកនូវបរិយាកាស​ថ្មី។ ប៉ុន្តែត្រូវចាំថា យ៉ាងហោចណាស់ត្រូវមានមនុស្សម្នាក់ចេះបើកបរ និងមានប័ណ្ណ​បើក​បររួម​ដំណើរ​ជា​មួយ​នឹង​អ្នក​ទាំង​អស់​គ្នា។

Abe Kengo