តើ​តួអង្គ Mario ដែល​ល្បី​ល្បាញ​នៅ​លើ​ពិភព​លោក​មាន​ឈ្មោះ​ពិត​អ្វី?

តើតួអង្គ Mario ដែលល្បីល្បាញនៅលើពិភពលោកមានឈ្មោះពិតអ្វី?

ខ្ញុំជឿថា ប្រិយមិត្តទាំងអស់គ្នាប្រាកដជាស្គាល់ឈ្មោះរបស់តួអង្គ Mario ជាតួអង្គប្រឌិតដែលបង្កើត​ឡើង​ដោយ​អ្នករចនាវីដេអូហ្គេមជនជាតិជប៉ុន Miyamoto Shigeru ។ ហើយនេះជាតួអង្គដែល​តំណាងឲ្យ​យីហោវីដេអូហ្គេម Mario និងជាតួអង្គសំខាន់របស់ក្រុមហ៊ុនវីដេអូហ្គេមជប៉ុន Nintendo ។ តួអង្គ Mario បាន​បង្ហាញ​ខ្លួន​ជាង ២០០ វីដេអូហ្គេមចាប់តាំងពីពេលដែលត្រូវបានបង្កើតឡើង។

ហ្គេមដែលពេញនិយមបំផុត Super Mario Brothers លក់បាន ៤០,២៤ លានច្បាប់នៅទូទាំងពិភព​លោក ហើយស៊េរីហ្គេមមួយនេះបន្តអភិវឌ្ឍ ដែលលក់បានសរុប ៧៦០ លានច្បាប់ ហើយថែមទាំង​ត្រូវ​បាន​កែសម្រួល​ទៅ​ជា​ខ្សែភាព​យន្ត​ទៀត​ផង។

ក្នុងពិធីបិទព្រឹត្តិការណ៍កីឡាអូឡាំពិកទីក្រុងប៉ារីស នៅពេលនោះ អតីតនាយករដ្ឋមន្រ្តីលោក Abe Shinzo បាន​តុប​តែង​ធ្វើ​ជា​តួអង្គ Mario ដើម្បីប្រគល់សិទ្ធិគ្រប់គ្រងកីឡាអូឡាំពិកទីក្រុង​តូក្យូ​បន្ទាប់ ហើយ​ចាប់​តាំង​ពី​ពេល​នោះតួអង្គ Mario បានក្លាយជានិមិត្តសញ្ញាពិសេស និងជាតួអង្គ​តំណាង​​ឲ្យ​​ជប៉ុន។

ប្រហែលជាពិបាកនឹងរកបានតួអង្គប្រឌិតជាបុរសវ័យកណ្តាលម្នាក់ ហើយល្បីនៅលើពិភពលោកដូច​ជា​តួអង្គ Mario ខ្លាំង​ណាស់។

ក្នុងនាមខ្ញុំបាទជាបុរសវ័យកណ្តាលម្នាក់ ខ្ញុំ​មាន​មោទនភាព​យ៉ាង​ខ្លាំង​ចំពោះ​វត្តមានរបស់តួអង្គមួយនេះ។

ប៉ុន្តែមានចំណុចមួយដែលធ្វើឲ្យខ្ញុំឆ្ងល់ ដែលជាឈ្មោះរបស់តួអង្គ Mario Brothers ។

ក្នុង Mario តួអង្គដែលស្លៀកពាក់ពណ៌បៃតងគឺជាប្អូនប្រុសរបស់ Mario ដែល​មាន​ឈ្មោះ​ថា Luigi ។

ឈ្មោះនេះមានប្រភពមកពីអក្សរជប៉ុន 類似 (ruigi) ដែលមានន័យថា “ដូចគ្នា” ហើយដោយ​សារ​តែ​ពួក​គេ​ទាំង​ពីរ​ជា​បង​ប្អូន​បង្កើត ដូច្នេះ​ពួក​គេ​ត្រូវបាន​គេ​ហៅ​ថា Mario Brothers ។

ហើយនេះជាចំណុចដែលធ្វើឲ្យខ្ញុំងឿងឆ្ងល់។

ខ្ញុំមានឈ្មោះថា Abe Kengo ក្នុងនោះ Abe គឺជានាមត្រកូល ចំណែកឯ Kengo គឺជាឈ្មោះ។ ក្នុងវប្បធម៌ជប៉ុន យើងខ្ញុំត្រូវបានគេហៅនាមត្រកូល មិនមែនហៅឈ្មោះនោះទេ។ ដូច្នេះ​ហើយ​ នៅ​ពេល​​ដែល​​រំលឹក​​ដល់​​បង​​ប្អូន​​គ្រួសារ​​ខ្ញុំ​​គេ​​នឹង​​ហៅ​​ថា “Abe Brothers” ។

យោងតាមការបកស្រាយនេះ ប្រសិនបើហៅបងប្អូនគ្រួសារ Mario ថា Mario Brothers ដែលមាន​ន័យ​ថា Mario គឺជានាមត្រកូល។ ដូច្នេះហើយ Luigi ប្រើនាមត្រកូល Mario មានន័យថាឈ្មោះ និង​នាម​ត្រកូល​ពេញ​គឺ Mario Luigi ។ ប្រសិនបើហៅតាមបែបជាភាសាអង់គ្លេស ឈ្មោះមុន​នាម​ត្រកូល​ក្រោយ​ហៅ​ថា Luigi Mario ។

ដូច្នេះចុះ Mario វិញ តើនាមត្រកូល និងឈ្មោះពេញរបស់បងប្រុសជាអ្វី?

នៅពេលដែលត្រូវបានកែសម្រួលទៅជាភាពយន្ត នេះជាសំណួរ​ដែល​ក្រុម​ផលិត​រឿង Mario ត្រូវប្រឈម​មុខ។ ពិត​ជា​យឺត​ពេល​ទៅ​ហើយ​ប្រសិន​បើ​ចង់​ដាក់​ឈ្មោះ​ពេញ​ឲ្យ Mario ។

នៅទីបំផុតពួកគេបានសន្និដ្ឋានហៅឈ្មោះពេញរបស់ Mario ថា Mario Mario ។

ស្តាប់ទៅដូចជាឆ្គងបន្តិចមែនទេអ្នកទាំងអស់គ្នា?

ទោះជាយ៉ាងណា Miyamoto Shigeru ដែលជាអ្នកបង្កើត Mario មិនបានទទួលស្គាល់ឈ្មោះនេះជា​ឈ្មោះ​ពិត​របស់ Mario នោះ​ទេ។

ដូច្នេះតើឈ្មោះពិតរបស់តួអង្គម្នាក់នេះជាអ្វី? ចំណុចនេះមិនទាន់សម្រេចជាផ្លូវការនៅឡើយទេ។

Mario ត្រូវបានបង្កើតឡើងក្នុងឆ្នាំ ១៩៨៥ និងទទួលបានប្រជាប្រិយភាពយ៉ាងខ្លាំង ដែលធ្វើឲ្យគ្រប់គ្នាមានការភ្ញាក់ផ្អើល។ ពិតជាគួរឲ្យចាប់អារម្មណ៍ណាស់នៅពេលដែលយើងមិនអាចទាយដឹង​ពី​ការ​និយម​ចូល​ចិត្ត​របស់​អ្នក​គាំទ្រ និង​ចំណុច​ដែល​ស្រដៀង​គ្នា។

មានរឿងខ្លះកើតឡើងដោយមិននឹកស្មានដល់ ហើយមិនស្ថិតក្នុងការរំពឹងទុករបស់យើង ដូច្នេះមេរៀនដែលខ្ញុំទទួល​បាន​គឺ នៅ​ពេល​បង្កើត​ផលិតផលណាមួយ យើងត្រូវរៀបចំឲ្យបានហ្មត់​ចត់ និងពេញលេញ ដើម្បី​ត្រៀម​ប្រឈម​នឹង​ស្ថាន​ភាព​វិជ្ជមាន ឬ​អវិជ្ជមាន​ដែល​អាច​កើត​ឡើងនៅ​ពេល​ណា​មួយ។

Abe Kengo