យុទ្ធសាស្រ្ត​​របស់​អាជីវកម្ម និង​អ្នក​​គាំទ្រ Gundam ដើម្បី​ទប់​​ស្កាត់​​សកម្មភាព​​លក់​​បន្ត​​របស់​​បុគ្គល​​មួយ​​ចំនួន

យុទ្ធសាស្រ្ត​របស់អាជីវកម្ម និងអ្នក​គាំទ្រ Gundam ដើម្បី​ទប់​​ស្កាត់​​សកម្មភាព​​លក់​​បន្ត​​របស់​​បុគ្គល​មួយ​​ចំនួន។

ក្នុងអាជីវកម្ម “អ្នកលក់បន្ត” គឺជាក្រុមហ៊ុន ឬបុគ្គលដែលទិញទំនិញ ឬសេវាកម្មដើម្បីលក់បន្តទៅឲ្យអ្នកដទៃ ដោយមិនប្រើប្រាស់សម្រាប់គោលបំណងផ្ទាល់ខ្លួននោះទេ។ ជាទូទៅពួកគេស្វែង​រក​ប្រាក់​ចំណេញ​តាម​រយៈ​តម្លៃ​ទិញ​ចូល និង​លក់​ចេញ។

អាជីវកម្មជប៉ុននៅតែបន្តផលិតផលិតផលដែលពេញនិយមនៅលើពិភពលោក។ ទោះ​ជា​យ៉ាង​ណា មានមនុស្សមួយចំនួនបានទិញផលិតផលទាំងនេះ ដែល​បណ្តាល​ឲ្យ​ទំនិញ​ខ្វះ​ខាត ហើយ​លក់បន្ត​ក្នុង​តម្លៃ​ខ្ពស់​នៅ​លើ​ហាង​លក់​ទំនិញ​អនឡាញ។

ដោយមិនយល់ស្របនឹងសកម្មភាពកេងចំណេញបែបនេះ អ្នកប្រើបណ្តាញសង្គមជប៉ុនបានចូល​ដៃ​គ្នា​បញ្ឆោត​បុគ្គល​ដែល​ឆក់​ឪកាស​ពេល​ទំនិញ​ឡើង​ថ្លៃ។

តើលទ្ធផលរវាងការប្រកួតប្រជែងគ្នានេះនឹង​ទៅជា​យ៉ាងណា? សូមតាមដានទាំងអស់គ្នា។

ប្រសិនបើលោកអ្នកចូលចិត្តរឿងគំនូរជីវចល Anime អ្នកទាំងអស់គ្នាប្រាកដជាស្គាល់ឈ្មោះ “Gundam” ដែល​ជាបណ្តាញផ្សព្វផ្សាយ​បែប​វិទ្យា​សាស្ត្រ​ប្រឌិត​ដ៏​ពេញ​និយមបំផុតទាំងនៅក្នុងប្រទេស​ជប៉ុន និង​ជុំវិញ​ពិភព​លោក។

ទម្រង់មនុស្សយន្តជ័រ Gundam មានប្រជាប្រិយភាពយ៉ាងខ្លាំង រហូតដល់ថ្នាក់នៅពេលខ្លះការផលិត​មិន​អាច​បំពេញ​តម្រូវ​ការ។

ហើយនេះជាឳកាសសម្រាប់បុគ្គលដែលឆក់ឪកាសពេលទំនិញឡើងថ្លៃ។

នៅឆ្នាំ ២០២០ តុក្កតាជ័រដែលមានឈ្មោះថា Tristan ត្រូវបានដាក់លក់នៅលើទីផ្សារ ប៉ុន្តែផលិត​ផល​នេះបែរ​ជា​មិន​មាន​ប្រជា​ប្រិយ​ភាព​ទៅ​វិញ។ ហាងលក់ទំនិញប្រឈមនឹងស្ថានភាពលំបាកដោយ​សារ​ផលិត​ផល​មិន​អាច​លក់​ចេញ។

ប្រសិនបើជាអ្នកគាំទ្រ Gundam ដ៏ស្មោះត្រង់ម្នាក់ ភាគច្រើនអ្នកទាំងអស់គ្នានឹងដឹងពីស្ថាន​ភាព​នេះ ប៉ុន្តែដើម្បីយកឈ្នះបុគ្គលដែលឆក់ឳកាសពេល​ទំនិញ​ឡើង​ថ្លៃ ព័ត៌មានក្លែងក្លាយមួយត្រូវបាន​ផ្សព្វ​ផ្សាយ​នៅ​លើ​បណ្តាញ​សង្គម​ដោយ​និយាយ​ថា៖

“Tristan គឺជាផលិតផលដ៏អស្ចារ្យបំផុត! ប្រសិនបើមិនទិញឥឡូវនេះ ប្រហែលជាអ្នកគ្មាន​ឳកាស​ទិញ​នោះ​ទេ” ។

អ្នកដែលគាំទ្រមួយចំនួនទៀត បន្ទាប់ពីបានឃើញការបង្ហោះនេះ សុទ្ធតែយល់ពីអត្តន័យបង្កប់ពីក្រោយ និងគោលបំណងរបស់អ្នកដែលបង្ហោះអត្តបទ ដូច្នេះពួកគេបានឆ្លើយតបយ៉ាងសកម្ម ដោយ​បង្ហោះ​សារ​គាំទ្រ​ស្រដៀង​គ្នា​ដូច​ជា៖ “ខ្ញុំក៏ទិញវាដែរ” ឬ “ប្រញាប់ទិញមុនពេលដែលទំនិញអស់​ពី​ស្តុក” ជា​ដើម។

បន្ទាប់ពីព័ត៌មានក្លែងក្លាយត្រូវបានបង្ហោះស្រាប់តែទទួលបានប្រសិទ្ធភាពភ្លាមៗ ហើយបុគ្គលដែល​មើល​ឃើញ​ថា នេះជាឳកាសសម្រាប់រកប្រាក់ចំណេញ ដូច្នេះពួកគេចាប់ផ្តើមទិញទំនិញនៅទូទាំង​ប្រទេស​ជប៉ុន។ យុទ្ធសាស្ត្ររបស់បុគ្គលទាំងនេះគឺទិញទំនិញដែលកំពុងតែពេញនិយម ហើយបន្ទាប់​មក​លក់​បន្ត​ទៅ​ឲ្យអតិថិជនក្នុងតម្លៃខ្ពស់ ខ្ពស់ជាងតម្លៃលក់។

យ៉ាងណាមិញ លើកនេះមិនដូចគ្នានោះទេ។ ផលិតផលដែលពួកគេបានទិញនៅលើបណ្តាញសង្គមទុកសម្រាប់ពេលឡើងថ្លៃលើកនេះ ជាក់ស្តែងមិនមែនជាផលិតផលដែលពេញនិយមនោះទេ ដូច្នេះ​ការ​លក់​បន្ត​គឺ​មិន​អាច​ទៅ​រួច​ឡើយ។

ផ្ទុយ​ទៅ​វិញ ហាងលក់ផលិតផលទាំងនេះបែរជាកំពុងសប្បាយចិត្ត ព្រោះស្រាប់តែមានអ្នក​ជួយ​ទិញ​ទំនិញ​ដែល​នៅ​សល់​ក្នុង​ស្តុក​លក់​មិន​ចេញ។

យុទ្ធសាស្រ្តបរាជ័យ ភាគីអ្នកឆក់ឪកាសពេលទំនិញឡើងថ្លៃត្រូវបង្ខំចិត្តបញ្ចុះតម្លៃ លក់ខាតក៏នៅតែលក់មិនអស់ទំនិញ ហើយលទ្ធផលត្រូវខាតប្រាក់មួយចំនួនធំ និងបរិមាណទំនិញយ៉ាងច្រើន​ដែល​លក់​មិន​ចេញ។

អ្នកគាំទ្របានសហការគ្នា “ប្រើល្បិច​បញ្ឆោត” ដើម្បីយកឈ្នះបុគ្គលដែលឆក់ឳកាសពេលទំនិញឡើង​ថ្លៃ។

ទន្ទឹមនឹងនោះ ភាគីក្រុមហ៊ុនផលិតក៏បានខិតខំប្រឹងប្រែងអស់ពីលទ្ធភាពដើម្បីការពារសកម្មភាព​របស់​បុគ្គលដែលឆក់ឳកាសពេលទំនិញឡើងថ្លៃផងដែរ។

នៅពេលដែលផលិតផល Hi-ν Gundam ត្រូវបានដាក់ចេញលើទីផ្សារបានក្លាយជាគោលដៅរបស់បុគ្គលដែលឆក់ឳកាសពេលទំនិញឡើងថ្លៃ ប៉ុន្តែ​ហាង​មួយ​ចំនួន​បាន​កំណត់​ច្បាប់​ថា ពួកគេនឹងមិនលក់ផលិតផលដល់អ្នកដែលមិនអាចអានឈ្មោះផលិតផលត្រូវនោះទេ។ ក្នុងភាសាជប៉ុនរបៀបអានឈ្មោះរបស់ផលិតផលមានភាពខុសគ្នាបន្តិចបើប្រៀបនឹងរបៀបសរសេរ ដូច្នេះមាន​តែ​អ្នក​គាំទ្រ​ប៉ុណ្ណោះ​ដែល​អាច​អាន​បាន។

ដើម្បីទិញផលិតផលឲ្យបានច្រើនបំផុត អ្នកលក់រាយថែមទាំងបានជួលមនុស្សជាច្រើនឲ្យឈរតម្រង់មុខហាងតាំងពីព្រឹកដើម្បីដណ្តើមទិញ ប៉ុន្តែលទ្ធផលមិនត្រឹមតែមិនអាចទិញផលិតផលព្រោះតែមិនអាចអានឈ្មោះផលិតផលត្រូវប៉ុណ្ណោះទេ ថែមទាំងខាតប្រាក់ជួលមនុស្សឲ្យឈរតម្រង់​ជួរ​ដណ្តើម​ទំនិញ​ទៀត​ផង។ 

ស្រដៀងនឹងផលិតផល Nintendo Switch 2 ជាប្រភេទម៉ាសុីនលេងហ្គេមដែលដាក់លក់កាល​ពី​ខែ​មិថុនា​ឆ្នាំ ២០២៥ ។ ដើម្បីទប់ស្កាត់បញ្ហាទិញស្តុកទុក ក្រុមហ៊ុន Nintendo បានប្រកាសថា ពួក​គេនឹងចេញប័ណ្ណធានាសម្រាប់ផលិតផល Switch 2 នោះ​ទេ ប៉ុន្តែនឹងជួសជុលផលិតផល ប្រសិន​បើ​អតិថិជន​​មាន​វិក្កយ​បត្រ​ទិញ​ទំនិញ។ អ្នកលក់បន្តច្រើនតែទិញក្នុងបរិមាណច្រើន ដូច្នេះហើយ ពួក​គេ​មិនមានវិក្កយបត្រដោយឡែក សម្រាប់​បំពេញតម្រូវការជួសជុល និងការធានាពីក្រុមហ៊ុននោះ​ទេ។

ផលិតផលដែលទិញពីកន្លែងលក់បន្តមិនមានការធានា ឬជួសជុលនោះទេ ដូច្នេះនេះជាចំណុចដែល​ធ្វើ​ឲ្យ​អ្នក​ទិញ​គួរ​ពិចារណា។

ដោយសារការខិតខំប្រឹងប្រែងរវាងអាជីវកម្ម និងអ្នកប្រើប្រាស់ យុទ្ធសាស្ត្រមួយត្រូវបានអនុវត្តនៅ​ក្នុង​ប្រទេស​ជប៉ុន ដើម្បីលុបបំបាត់ទាំងស្រុងកន្លែងលក់បន្តដែលមានគោលបំណងស្តុកទុកទំនិញ។ ដើម្បី​ឲ្យអ្នកប្រើប្រាស់អាចទិញទំនិញដែលខ្លួនចូលចិត្តដោយសេរី ដោយមិនចាំបាច់ព្រួយបារម្ភ​ពី​បញ្ហា​នេះត​ទៅ​ទៀត​ឡើយ។

បច្ចុប្បន្ននេះ នៅប្រទេសជប៉ុនមានភាពតឹងរ៉ឹងយ៉ាងខ្លាំង ត្រួតពិនិត្យគ្រប់ផលិតផលទាំងអស់ មិន​ថា​ទំនិញ​ដែលមានតម្លៃថោក ឬទំនិញប្រណីតនោះទេ។ ចំណុចនេះបញ្ជាក់ពីសាមគ្គីភាព និង​ផល​ប្រយោជន៍​ទៅ​វិញ​ទៅ​មករវាងក្រុមហ៊ុនផលិតផលិតផល និងអ្នកប្រើប្រាស់។

Abe Kengo