អតីត​កំពូល​​អ្នក​​ចំបាប់​​ជប៉ុន និង​ការ​ខិត​ខំ​ប្រឹង​ប្រែង​ជួយ​សង្គ្រោះ​មនុស្ស​ដ៏​គួរ​ឲ្យ​សរសើរ

អតីត​កំពូល​​អ្នក​​ចំបាប់​​ជប៉ុន និង​ការ​ខិត​ខំ​ប្រឹង​ប្រែង​ជួយ​សង្គ្រោះ​មនុស្ស​ដ៏​គួរ​ឲ្យ​សរសើរ។

ប្រសិនបើប្រិយមិត្តមិនទាន់បានដឹងទេថា “កីឡាចំបាប់អាជីព” ឬ​ក្នុង​ភាសា​អង់គ្លេស​យើងហៅ​ថា “professional wrestling” គឺជាទម្រង់នៃការសម្តែងកីឡា កត្តាប្រយុទ្ធប្រកួតប្រជែងគ្នា និងសាច់​រឿង។ ការប្រកួតត្រូវបានរៀបចំឡើងដោយប្រើក្បាច់ប្រយុទ្ធជាច្រើន ស្ថានភាពមិន​ដឹង​មុន និង​សាច់​រឿង​ដើម្បី​ទាក់​ទាញ​ទស្សនិក​ជន ទាំង​ដែល​លទ្ធផល​ត្រូវ​បាន​កំណត់​មុន​ក៏​ដោយ។

មិនដូចជាការប្រកួតកីឡាផ្សេងទៀតនោះទេ កីឡានេះផ្តោតសំខាន់លើរបៀបបង្កើតការប្រកួតដែលមានភាពទាក់ទាញ ដោយមិនផ្តោតលើរឿងឈ្នះ ឬចាញ់ឡើយ។

កាលពីក្មេង ខ្ញុំធ្លាប់ស្គាល់អ្នកចំបាប់ដែលមានស្មារតីរឹងមាំម្នាក់មានឈ្មោះថា Antonio Inoki ។

មិនត្រឹមតែប្រកួតនៅលើសង្វៀនប៉ុណ្ណោះទេ លោក​ថែម​ទាំង​បាន​ប្រឡូក​ក្នុង​ឆាក​នយោបាយ និង​បន្សល់​ទុក​រឿង​ដ៏​អស្ចារ្យ​មួយ ដោយ​បាន​ជួយ​សង្គ្រោះ​ជីវិត​ប្រជាជន​ជប៉ុន​ចំនួន ៣៦ នាក់។

សូមក្រឡេកមកមើលរឿងដ៏អស្ចារ្យរបស់លោក ជា​រឿង​ដែល​អ្នក​នយោបាយ​ធម្មតា​មិនអាចធ្វើបាន។

ពីអ្នកចំបាប់ក្លាយជាតំណាងរដ្ឋសភា

Inoki ជា​អ្នក​ចំបាប់​ដ៏​ល្បីឈ្មោះម្នាក់ក្នុងពិភពកីឡា​ចំបាប់​អាជីព​​របស់​​ជប៉ុន។ លោក​តែង​តែបង្ហាញខ្លួននៅលើសារព័ត៌មាន និងក្លាយជាប្រធានបទដែលមនុស្សជាច្រើនរំលឹកដល់ រួម​ទាំងការប្រកួតក្បាច់គុនចម្រុះជាមួយម្ចាស់ជើងឯកប្រដាល់កម្រិតធ្ងន់នៅ​លើពិភពលោកមានឈ្មោះ​ថា Muhammad Ali ។ ហើយ​បន្ទាប់​ពី​ចូល​និវត្តន៍​ពី​កីឡា​ចំបាប់ លោក​បាន​ផ្លាស់​ទៅ​សភា​ក្នុង​នាម​​ជា​​សមាជិក​​សភា។

ករណីចាប់ចំណាប់ខ្មាំងជនជាតិជប៉ុនកើតឡើងនៅអុីរ៉ាក់

នៅមុនពេលដែលសង្រ្គាមរវាងអុីរ៉ាក់ សហរដ្ឋអាមេរិក និងមហាអំណាចសម្ព័ន្ធមិត្តបានផ្ទុះឡើង អុីរ៉ាក់បានហាមឃាត់ជនបរទេសមិនឲ្យចាកចេញពី​ប្រទេស​អុីរ៉ាក់ ហើយចាប់ពួកគេធ្វើជាចំណាប់ខ្មាំង​ដើម្បី​ការ​ពារ​មិន​ឲ្យ​ប្រទេស​ផ្សេង​ទៀត​ឈ្លាន​ពាន។

ក្នុងស្ថានភាពនេះ មានបុគ្គលចំនួនពីរនាក់បានធ្វើសកម្មភាព។

ម្នាក់ជាអតីតនាយករដ្ឋមន្ត្រីលោក Nakasone Yasuhiro ។ លោកទទួលបានជោគជ័យក្នុងការចរចារ​ដោះ​លែង​ចំណាប់​ខ្មាំង​ប្រហែល​មួយ​ភាគបី ប៉ុន្តែ​មនុស្ស​ជា​ច្រើន​នៅ​តែជាប់នៅប្រទេសអុីរ៉ាក់។

បន្ទាប់មកទៀតលោក Antonio Inoki បានធ្វើអន្តរាគមន៍។ ព្រោះតែបារម្ភមិនដឹងថា​សង្គ្រាម​នឹង​​ផ្ទុះ​​ឡើង​​នៅ​​ពេល​​ណា លោក Inoki បានទៅកាន់ប្រទេសអុីរ៉ាក់ ដោយមិនខ្វល់ពីការព្រមានរបស់​រដ្ឋាភិបាល​ជប៉ុន។ ក្រោយមក លោកបានរៀបចំការប្រកួតកីឡាចំបាប់អាជីពនៅប្រទេសអុីរ៉ាក់ ដើម្បី​លើក​កម្ពស់​ទំនាក់​ទំនង។ ទោះ​ជា​យ៉ាង​ណា ចំណាប់​​ខ្មាំង​មិនទាន់ត្រូវបានដោះលែងនោះ​ទេ។

នៅពេលដែលលោក Inoki ព្យាយាមបន្តការចរចា គាត់បានគិតឃើញគំនិតមួយ។ ដោយគិតថា គាត់នឹងមិនអាចរកឃើញដំណោះស្រាយនោះទេ ប្រសិន​បើ​មិន​យល់​ពី​គំនិត​របស់​ភាគី​ម្ខាង​ទៀត គាត់ក៏បានប្តូរទៅសាសនាអុីស្លាម។ នៅទីបំផុត លោកទទួលបានជោគជ័យក្នុងការទំនាក់ទំនង​ជា​​មួយ​​ពួក​​គេ និង​រំដោះ​ចំណាប់​ខ្មាំង​ទាំង​អស់។

នៅពេលនោះ រដ្ឋាភិបាល​ជប៉ុន​បាន​ប្រឆាំង​យ៉ាង​ខ្លាំង​ចំពោះ​សកម្មភាព​របស់​លោក Inoki ព្រោះ​ប្រទេស​​ជិត​នឹង​កើត​មាន​សង្គ្រាម។

ខណៈពេលដែលត្រូវគេចំអកថា គ្រាន់​តែ​ជា​អតីត​កីឡាករ​ចំបាប់ និង​អ្នក​នយោបាយ​ធម្មតា​ម្នាក់​ប៉ុណ្ណោះ អាចធ្វើអ្វីបាន លោកបានធ្វើអន្តរាគមន៍ម្នាក់ឯង ហើយ​នៅ​ទី​បំផុត​រំដោះបានចំណាប់​ខ្មាំង​ទាំង​អស់។

ស្រដៀងគ្នាដែលនៅកូរ៉េខាងជើង

នៅពេលនោះ ទំនាក់ទំនងរវាងកូរ៉េ និងជប៉ុនមិនសូវល្អប៉ុន្មានទេ។ រដ្ឋាភិបាល​ជប៉ុន​សង្ស័យ​ថា ជនជាតិ​ជប៉ុន​ជា​ច្រើន​នាក់​ត្រូវ​បាន​ចាប់​ខ្លួន ហើយ​ប្រើ​ធ្វើ​ចារកម្ម​​សម្រាប់​ប្រទេស​​កូរ៉េ​​ខាង​ជើង។

គោលបំណងរបស់លោក Inoki គឺកែលម្អទំនាក់ទំនងដ៏អាក្រក់នេះ។

លោក Inoki បានទៅកាន់ប្រទេសកូរ៉េខាងជើងជាច្រើនដង និងជួបជាមួយមន្ត្រីរដ្ឋាភិបាល។ នៅ​ទី​នោះ លោក​ក៏​បាន​ធ្វើ​ទំនាក់​ទំនង​ការ​ទូត​តាម​រយៈការប្រកួតកីឡាចំបាប់អាជីពផងដែរ។ គោល​បំណង​របស់លោក​គឺ​បង្កើត​លក្ខខណ្ឌ​សម្រាប់​ថ្នាក់​ដឹកនាំរបស់ប្រទេសទាំងពីរជួបគ្នា។

នៅទីបំផុត ប្រទេសកូរ៉េខាងជើងបាន​សារភាពករណីចាប់ខ្លួន និង​បាន​រៀបចំ​កិច្ចប្រជុំ​កំពូលរវាងថ្នាក់ដឹកនាំជាន់ខ្ពស់។ ជន​រង​គ្រោះ​មួយ​ចំនួន ទោះបីជាមិន​ទាំង​អស់​ក្ដី ត្រូវបានបញ្ជូនត្រឡប់​ទៅ​ប្រទេស​ជប៉ុន​វិញ។

តាមរយៈកីឡា និងការតាំងចិត្តដែលគាត់មានដោយសារកីឡា លោក Inoki សម្រេចបានទំនាក់ទំនង​ការ​ទូត​ដែល​អ្នក​ដទៃ​មិន​អាច​ធ្វើ​បាន។

ជា​អកុសល លោកបាន​ទទួល​មរណភាព​ក្នុង​ឆ្នាំ ២០២២ ។

បុរសម្នាក់ដែលមិនដែលបោះបង់ មិនចេះអួតអាង និងហានលះបង់ខ្លួនខំប្រឹងតស៊ូ ជួយសង្គ្រោះជីវិតមនុស្សដែលមិនមែនជាសាច់ញាតិ។ រឿងរ៉ាវរបស់លោកពិតជាអស្ចារ្យណាស់ ជារឿងដែលយើង​គួរ​តែ​ចង​ចាំ​ ហើយចាត់​ទុក​ដូច​ជា​គំរូ ដោយ​សារ​​តែ​​ភាព​​ក្លាហាន និង​​ទឹក​​ចិត្ត​​របស់​​លោក។

ខ្ញុំនឹងចងចាំជានិច្ច ហើយ​សូម​ឲ្យ​វិញ្ញាណក្ខន្ធ​របស់​លោក​ទៅ​កាន់​សុគតិភព។

Abe Kengo