កំណប់មានពិតមែន

កំណប់មានពិតមែន

រឿងគំនូរជីវចលដ៏ល្បី One Piece ចាប់ផ្តើមដោយសម្តីរបស់ស្តេចចោរសមុទ្រ “ខ្ញុំ​រំលង​គ្រប់​យ៉ាង​នៅ​លើ​ពិភព​លោក​នេះ​” ។

ប្រសិនបើយើងយល់ថា Anime ជាមធ្យោបាយដែលគេប្រើសម្រាប់រៀបរាប់រឿងក្នុងក្តីស្រមៃ ឥឡូវនេះ​មាន​រឿង​ស្រដៀង​គ្នា​មួយ ដែល​ប្រៀបដូចជាក្នុងពិភពពិត ហើយថែមទាំង​បាន​កើតឡើងនៅសម័យ​​បច្ចុប្បន្នផង​ដែរ។

អ្នកដែលលាក់​កំណប់​នេះជាស្រ្តីជនជាតិជប៉ុនម្នាក់ហៅថា ព្រះនាង Tenko ។

ដូច្នេះហើយ តើតួអង្គម្នាក់នេះជា​នរណា ហើយរឿងរ៉ាវនិយាយពីកំណប់យ៉ាងម៉េចវិញ? យើងនឹងតាម​​ដាន​​ទាំង​​អស់​គ្នា។ 

តើព្រះនាង Tenko ជានរណា?

ព្រះនាង Tenko ឈ្មោះពិតហៅថា Mariko Itakura (板倉 満里子) គឺជាសិស្សរបស់លោក Hikita Tenko ដែលជាគ្រូវេទមន្តល្បីឈ្មោះនៅប្រទេសជប៉ុន និងបាន​ប្រើ​ឈ្មោះរបស់លោកដើម្បីក្លាយទៅ​ជា Hikita Tenko ជំនាន់​ទី​ពីរ បន្ទាប់​មក​បាន​បន្ត​អាជីពជា​គ្រូវេទមន្ត និង​សម្តែង​យ៉ាង​អស្ចារ្យ។

អ្នកស្រីកើតនៅថ្ងៃទី ២៩ ខែមិថុនា ឆ្នាំ ១៩៥៩ ។

មុន​ពេល​ក្លាយ​ជា​គ្រូ​វេទមន្ត អ្នកស្រីធ្លាប់ធ្វើជាអ្នកចម្រៀងប៉ុបដោយប្រើឈ្មោះថា Mari Asakaze (朝風 まり) ។

ព្រះនាង Tenko ត្រូវបានគេចាត់ទុកជាមនុស្សដែលមានស្ទីលសម្តែងពិសេស ការសម្តែងវេទមន្តគ្រោះ​ថ្នាក់ និង​ស្មុគ​ស្មាញ។

អ្នកស្រីកាន់តែល្បីឈ្មោះនៅលើពិភពលោកដោយបានប្រើឈ្មោះជាភាសាអង់គ្លេសហៅថា “Princess Tenko” ។

រឿង Anime “Tenko” ត្រូវបានបំផុសគំនិតដោយអ្នកស្រី និងកាន់តែពេញនិយមយ៉ាងខ្លាំងនៅសហរដ្ឋ​អាមេរិក ហើយ​ជាក់​ស្តែង​លក់​តុក្កតា Tenko បាន​ចំនួន ៨ លាន​តុក្កតា។

អ្នកស្រីធ្លាប់​ចាក​ចេញ​ពី​ប្រទេស​ជប៉ុន និងធ្វើចំណាកស្រុកទៅកាន់សហរដ្ឋ​អាមេរិក ហើយប្រហែល​ជា​ថ្មីៗ​នេះ​អ្នកស្រីកំពុងរស់នៅអុីតាលី។

អ្នកស្រីមិនមែនចិញ្ចឹមប្រភេទសត្វធម្មតាប៉ុណ្ណោះទេ ផ្ទុយទៅវិញ អ្នកស្រីចិញ្ចឹមខ្លាសមួយក្បាល។ ភាគច្រើនមិត្ត​ភក្តិ​របស់​អ្នកស្រីសុទ្ធតែជាបុគ្គលដែលមានមុខមាត់នៅលើពិភពលោក ក្នុងនោះមាន​ទាំង​​ប្រធានាធិបតី​រុស្ស៊ី​លោក Putin ។

ស្រ្តីម្នាក់នេះមានចំណុចពិសេសជាច្រើន ដោយដឹងថា ប្រហែលជាកាលពីមុនអ្នកស្រីធ្លាប់ទៅ​កាន់ប្រទេស​កម្ពុជា។

កម្រិតប្រាក់ចំណូលខ្ពស់

អំឡុងពេលដែលអ្នកស្រីល្បីបំផុត ជាទូទៅអ្នកស្រីសម្តែងប្រហែល ៣០០ កម្មវិធីក្នុងមួយឆ្នាំ រក​បាន​ចំណូល​ពី ៥០ ទៅ ៨០ លាន​យ៉េន​ក្នុង​មួយ​កម្មវិធី។

ដោយគ្រាន់តែគណនាអ្នកនឹងដឹងថា ប្រាក់ចំណូលប្រចាំឆ្នាំរបស់អ្នកស្រីបានប៉ុន្មាន។ ហើយ​បើ​ទោះ​បីជា​មិន​បាន​គណនា​តួលេខ​ក៏​ដោយ អ្នក​នៅ​តែ​ដឹង​ថា​ចំនួន​ប្រាក់​ចំណូល​នេះ​ពិត​ជា​ច្រើនណាស់។

ល្បែងស្វែងរកកំណប់​

ទ្រព្យសម្បត្តិដែលព្រះនាង Tenko រកបានច្រើនរហូតដល់ថ្នាក់អ្នកស្រីចាយមិនអស់នោះទេ អ្នកស្រី​បាន​យក​ទ្រព្យ​សម្បត្តិ​ទាំង​នេះ​ទៅ​លេង​ល្បែង​ដ៏​គួរ​ចាប់​អារម្មណ៍​មួយ។

ហាក់បីដូចជាអ្នកស្រីបាន​កប់​កំណប់ចំនួន ៦ កន្លែងនៅ​ក្នុងប្រទេសជប៉ុន។ ថ្វីត្បិតតែ មិនបានបញ្ជាក់ថាកំណប់នោះជាសាច់ប្រាក់ គ្រឿងអលង្ការ ឬឯក​សារ​កម្មសិទ្ធិ​អ្វី​ម្យ៉ាង​ក៏​ដោយ យ៉ាង​​ណា​មិញ អ្នក​​​ស្រី​​​បាន​​​និយាយ​​​ថា ប្រសិន​​បើ​​រក​ឃើញ​មួយ​ក្នុង​ចំណោម​នោះ អាច​​រស់​​នៅ​​បាន​បី​ជំនាន់។

ហើយបើទោះបីជាកំណប់មិនត្រូវបានបញ្ជាក់ច្បាស់ក្នុងបទសម្ភាសន៍ក៏ដោយ ប៉ុន្តែកំណប់នីមួយប្រហែលជាជាង ២ ពាន់លានយ៉េន។ ច្រើនជិត ១០ ដងនៃប្រាក់ចំណូលជាមធ្យមពេញមួយជីវិតរបស់​ប្រជាជន​ជប៉ុន​ម្នាក់ ដូច្នេះ​សរុប​តម្លៃ​កំណប់​មាន​ចំនួន​រហូត​ដល់​ទៅ ១២ ពាន់​​លាន​​យ៉េន។

ហើយអ្វីដែលគួរឲ្យកត់សម្គាល់ជាងនេះទៅទៀតនោះគឺថា ភាគច្រើនគ្រប់គ្នាជឿថាកំណប់មានពិត​​មែន ដោយ​​​មិន​មាន​នរណា​គិត​ថា នោះ​ជា​រឿង​កុហក ឬ​​ល្បិច​​បោក​​បញ្ឆោត​​នោះ​​ទេ។

នេះមិនមែនជារឿងភាពយន្ត រឿង Anime នោះទេ ប៉ុន្តែនេះជារឿងដែលមានពិត។ ប្រហែលជាឥឡូវ​នេះ​កំណប់​ត្រូវ​បាន​កប់​ទៅ​ហើយ។

ឥឡូវនេះ អ្វីដែលត្រូវធ្វើគឺយកប៉ែល ហើយទៅកាន់ប្រទេសជប៉ុន មែនទេអ្នកទាំងអស់គ្នា។

និយាយអញ្ជឹង ទឹកប្រាក់មានចំនួនច្រើនមិនអាចយកទៅវិញដោយសម្ងាត់នោះទេ ដូច្នេះយើងត្រូវរាយការណ៍។ ហើយជាការពិតណាស់ បើទោះជាយើងជាអ្នករកឃើញកំណប់ដ៏ធំនេះក៏ដោយ នៅ​តែ​ត្រូវ​បំពេញ​កាតព្វកិច្ច​ពន្ធ ដូច្នេះ​សូម​កុំ​ភ្លេច​ចំណុច​នេះ។

សូមអរគុណព្រះនាង Tenko ដែលបានជួយឲ្យយើងគ្រប់គ្នា និងប្រជាជនជប៉ុនទាំងអស់មានក្តីស្រមៃ​អាច​ផ្លាស់​ប្តូរ​ជីវិត ទាំង​ដែល​គ្រប់​យ៉ាង​បាន​រលាយ​បាត់​ព្រោះ​តែ​ជីវិត​ជាក់​ស្តែង។

Abe Kengo