បច្ចេក​វិទ្យា​ផលិត​បង្គន់​របស់​ជប៉ុន​ដែល​ក្រុមហ៊ុន​​ចិន​មិន​អាច​ចម្លង​បាន

បច្ចេកវិទ្យាផលិតបង្គន់របស់ជប៉ុនដែលក្រុមហ៊ុនចិនមិនអាចចម្លងបាន។

តើអ្នកទាំងអស់គ្នាធ្លាប់ប្រើ Shower toilet – ជាប្រភេទបង្គន់បែបជប៉ុនដែរទេ?

ជាមួយនឹងបច្ចេកវិទ្យានេះ គ្រាន់តែចុចប៊ូតុង អ្នកប្រើប្រាស់នឹងទទួលបានការលាងសម្អាតដោយទឹកក្តៅឧណ្ហៗស្វ័យ​ប្រវត្តិ។

ដំបូងប្រហែលជាមិនទម្លាប់ ប៉ុន្តែនៅពេលដែលប្រើយូរៗទៅ អ្នកទាំងអស់គ្នានឹងចូលចិត្តភាពងាយស្រួលនេះ។

ក្រុមហ៊ុនផលិតរបស់ចិនបានព្យាយាមយ៉ាងខ្លាំងដើម្បីចម្លងផលិតផលនេះ យ៉ាងណាមិញ ផលិតផលហាក់បីដូចជាមិន​ទទួល​បាន​គុណភាព​ដូច​ផលិត​ផល​ជប៉ុន​នោះ​ទេ។

តើប្រជាជនជប៉ុនបានបង្កើតផលិតផលនេះដោយរបៀបណា? នៅថ្ងៃនេះ JAPO នឹងបង្ហើបអាថ៌កំបាំងនេះដល់អ្នក​ទាំង​អស់​គ្នា។

ចំនួនដែលលក់បាននៅលើពិភពលោក

TOTO គឺជាក្រុមហ៊ុនដំបូងគេដែលអភិវឌ្ឍ Shower toilet នៅប្រទេសជប៉ុន។

ការលក់បានចាប់ផ្តើមនៅឆ្នាំ ១៩៨០ ហើយការលក់បឋមត្រូវបានគេប៉ាន់ប្រមាណថាលើសពី ៥០ លានផលិតផល។ 

ក្នុងចំណោមក្រុមហ៊ុនផលិតដែលផលិតផលិតផលដូចគ្នា TOTO នៅតែមានមោទនភាពចំពោះការលក់ដ៏ឆ្នើមរបស់​ខ្លួន។

ប្រសិនបើលោកអ្នកសាកល្បងប្រើម្តង អ្នកទាំងអស់គ្នានឹងមានអារម្មណ៍ដឹងកាន់តែច្បាស់ពីភាពខុសគ្នារបស់ផលិត​ផល​នេះ។ ជា​ផលិតផល​ដែលត្រូវបានបង្កើតឡើងដោយការខិតខំប្រឹងប្រែងយ៉ាងខ្លាំង។

កំណត់ទីតាំងរន្ធគូថ

ដើម្បីសម្អាតបានត្រឹមត្រូវ ក្បាលម៉ាស៊ីនទឹកស្វ័យប្រវត្តិត្រូវបាញ់ទឹកឲ្យចំទីតាំងរន្ធគូថ។ ទោះជាយ៉ាងណា នៅពេលដែល​អភិវឌ្ឍ​ដំបូង TOTO មិន​មាន​ទិន្នន័យទាក់ទងនឹងទីតាំងរន្ធគូថនោះទេ។

ដូច្នេះហើយ បន្ទប់វាស់​ស្ទង់​មួយ​ត្រូវ​បាន​បង្កើត​ឡើងនៅខាងក្នុងក្រុមហ៊ុន ដើម្បីវាស់ស្ទង់ទីតាំងរន្ធគូថរបស់មនុស្ស​ជាង ៣០០ នាក់ រួម​ទាំង​បុគ្គលិក​ក្រុម​ហ៊ុន និងសមាជិកគ្រួសាររបស់ពួកគេ។

អ្នកដែលត្រូវគេវាស់ស្ទង់ប្រាកដជាមានអារម្មណ៍ពិបាកទ្រាំ ចំណែកឯអ្នកវាស់… ស្តាប់ទៅដូចជាឆ្កួតណាស់មែនទេ?

ហើយជាចុងក្រោយ ហាក់បីដូចជាទីតាំងក្បាលម៉ាសុីនទឹកត្រូវបានកំណត់យ៉ាងត្រឹមត្រូវ។

សីតុណ្ហភាពសមល្មម មិនក្តៅពេក ឬត្រជាក់ពេកនោះទេ

ផលិតផល TOTO នាំមកនូវភាពងាយស្រួលសម្រាប់អ្នកប្រើប្រាស់ជាមួយនឹងទឹកក្តៅឧណ្ហៗ។ ការពិសោធន៍ជាច្រើន​​ត្រូវ​​បាន​​ធ្វើ​​ឡើង​​ទើប​​អាច​ទទួល​បាន​លទ្ធផល​នេះ។

សីតុណ្ហភាពត្រូវបានកែតម្រូវក្នុងកម្រិតកើន 0.1°C ដើម្បីស្វែងរកសីតុណ្ហភាពដែលល្អបំផុត។

ទន្ទឹមនឹងនេះ បញ្ហាមួយចំនួនទាក់ទងនឹងការកែតម្រូវសីតុណ្ហភាពខ្យល់សម្រាប់សម្ងួតក្រោយពេលលាងសម្អាតក៏កើត​មាន​ផង​ដែរ។ មិនអាចត្រជាក់ពេក ហើយ​ក៏​មិន​អាច​ក្តៅ​ពេក​ដែរ ម្យ៉ាងវិញទៀត មិនអាចសម្ងួតបានល្អនោះទេ ប្រសិន​បើ​មិន​កំណត់​បរិមាណ​ខ្យល់​គ្រប់​ល្មម។ នោះហើយជាមូលហេតុដែលពួកគេធ្វើការស្រាវជ្រាវហ្មត់ចត់ និងធ្វើ​ការ​ពិសោធ​ម្តង​ហើយម្តងទៀត ដើម្បីកំណត់សីតុណ្ហភាព។

តើអ្នកដែលធ្លាប់ប្រើ Shower toilet មានអារម្មណ៍ថា មានភាពងាយស្រួល និងផាសុកភាពដូចដែលបានរៀបរាប់ខាង​លើ​ដែរ​ទេ? បើមិនអញ្ចឹងទេ ខ្ញុំគិតថា បង្គន់ដែលអ្នកប្រើមិនមែនជាផលិតផលរបស់ TOTO នោះទេ។

ថ្វីត្បិតតែ TOTO មានតម្លៃថ្លៃ ប៉ុន្តែនាំមកនូវអារម្មណ៍ល្អ និងភាពងាយស្រួលខ្ពស់។

ប្រសិនបើមើលឃើញផលិតផលនេះមានបំពាក់នៅសណ្ឋាគារ ឬហាងទំនិញ ទោះបីជាមិនដូចនឹងការរំពឹងទុក អ្នកទាំងអស់គ្នាអាចប្រើសាកល្បងមើល។ ខ្ញុំជឿថា អ្នកទាំងអស់គ្នានឹងទទួលបានបទពិសោធល្អបំផុតជាមួយផលិត​ផល​​នេះ។

នៅពេលខ្លះការប្រើបង្គន់ដែលមានផាសុកភាពអាចធ្វើឲ្យយើងមានអារម្មណ៍ធូរស្រាលជាងមុន ដែលរួមចំណែកកាត់​បន្ថយ​សកម្មភាព​អវិជ្ជមាន​ដូច​ជា​ជម្លោះ​ក្នុង​ជីវិត។

តើខ្ញុំ​អាច​ចាត់​ទុក​ថាបង្គន់ជប៉ុនជាផលិតផលបង្កប់អត្តន័យសន្តិភាពដែរទេ?

Abe Kengo