បច្ចេក​វិទ្យា​បង្គន់​ជប៉ុន​អាច​បង្កើត​អគ្គិសនី​ដោយ​ផ្ទាល់

បច្ចេកវិទ្យាបង្គន់ជប៉ុនអាចបង្កើតអគ្គិសនីដោយផ្ទាល់។

ជនជាតិជប៉ុនផ្តោតសំខាន់ទៅលើអនាម័យ និងភាពងាយស្រួលនៅគ្រប់ទីកន្លែង រួមទាំងបន្ទប់ទឹកផងដែរ។ នៅពេលដែលនិយាយពីចំណុច​នេះ ប្រហែល​ជា​គ្រប់​គ្នា​ស្គាល់​បង្គន់​ឆ្លាត​វៃ​ដែល​មានមុខ​​ងារសម្អាតដោយស្វ័យប្រវត្តិដែលជប៉ុនផលិត។

ប៉ុន្តែមិនត្រឹមតែប៉ុណ្ណឹង ពួកគេថែមទាំងបង្កើតបច្ចេកវិទ្យាឆ្លាតវៃជាច្រើនទៀតផងដែរ។ ឧទាហរណ៍​ដូចជានៅជប៉ុនឧបករណ៍ក្នុងបង្គន់មួយចំនួនថែមទាំងអាចបង្កើតអគ្គិសនីដោយផ្ទាល់​សម្រាប់ដំណើរការទៀងផង។

ជាដំបូងគឺការគ្រប់គ្រងម៉ាស៊ីនភ្លើងដោយស្វ័យប្រវត្តិ

កាលពីមុន សម្រាប់បង្គន់ដែលមានមុខងារបាញ់ទឹកលាងសម្អាត ឧបករណ៍បញ្ជានឹងភ្ជាប់ដោយផ្ទាល់​នៅ​លើ​ចាន​បង្គន់ ដែលផ្តល់ភាពងាយស្រួលនៅពេលដែលប្រើ។

បន្ទាប់មក ពួកគេបានប្តូរទៅប្រើឧបករណ៍បញ្ជាពីចម្ងាយ (remote) ប៉ុន្តែបែរជាមានបញ្ហាត្រង់​ថា​ប្រើ​ថ្ម។ ប្រសិន​បើ​អស់​ថ្ម មិន​អាច​ប្រើ​បាន​ទេ។

ដើម្បីដោះស្រាយបញ្ហានេះ វិស្វករបានបង្កើតឧបករណ៍បញ្ជាដែលអាចបង្កើតអគ្គិសនីដោយផ្ទាល់នៅពេលដែលប្រើប្រាស់។

នៅពេលដែលចុចប៊ូតុង កម្លាំងចុចនោះនឹងត្រូវបានបំប្លែងទៅជាថាមពលអគ្គិសនី ដើម្បីឲ្យឧបករណ៍​ដំណើរ​ការ។

ដូច្នេះហើយ ប៊ូតុងច្រើនតែរឹងបន្តិច ដែលតម្រូវឲ្យចុចខ្លាំងជាងនេះ។

នៅខាងក្នុងថែមទាំងមានយន្តការដែលធានាថាទោះបីជាចុចលឿន ឬយឺត ឧបករណ៍នៅតែអាច​បង្កើត​អគ្គិសនី​គ្រប់​គ្រាន់​សម្រាប់​ដំណើរ​ការ​ប្រកប​ដោយ​ស្ថេរភាព។

ក្រៅពីនេះត្រូវបានបំពាក់សំឡេងសម្រាប់ផ្តល់សញ្ញា ប្រសិនបើសំឡេងបន្លឺឡើងនៅពេលដែល​ចុច​ប៊ូតុង ចំណុច​នេះ​បង្ហាញ​ថា​យន្ត​ការ​បាន​ដំណើរ​ការ។

បន្ទាប់មកគឺឧបករណ៍អនាម័យ​ដែលប្រើកម្លាំងទឹក។

នៅតាមបន្ទប់ទឹកសាធារណៈជាច្រើននៅប្រទេសជប៉ុន អ្នកអាចនឹងមើលឃើញឧបករណ៍តូចមួយ​ដែលមានរាងដូចជាប្រអប់ពណ៌ប្រាក់ដាក់នៅជាប់ចានបង្គន់។ ឧបករណ៍នេះមានមុខ​ងារ​សម្អាត បំបាត់ក្លិន និងសម្លាប់មេរោគក្នុងបង្គន់។

ចំណុចដែលពិសេសត្រង់ថាវាមិនប្រើអគ្គិសនីខាងក្រៅនោះទេ។ ផ្ទុយទៅវិញ វាប្រើកម្លាំងទឹកនៅ​ពេល​ដែល​បញ្ចេញ​ដើម្បី​បង្កើត​ថាមពល (ដែល​ប្រៀប​បី​ដូច​ជា​ប្រព័ន្ធ​វារីអគ្គិសនី​ខ្នាត​តូច) ។

ដូច្នេះហើយ ឧបករណ៍អាចដំណើរទាន់ពេល – ជាទូទៅនៅពេលដែលទឹកជិតបញ្ចេញអស់ – ដើម្បីធានា​ថា​ទឹកសម្អាតដំណើរការប្រកបដោយប្រសិទ្ធភាព ជៀសវាងការបង្ហូរលឿនពេក។

ដូច្នេះជួយរក្សាឲ្យបង្គន់មានអនាម័យ សម្លាប់មេរោគកាន់តែមានប្រសិទ្ធភាព និងបង្ការភាពកខ្វក់ (ដូច​ជាកាកសំណល់ទឹកនោម) ដែលធ្វើឲ្យស្ទះបំពង់។

ការកែលម្អទាំងអស់នេះសុទ្ធតែមានគោលបំណងរក្សាអនាម័យល្អជាងមុន បង្កើនភាពងាយស្រួល កាត់​បន្ថយ​ការ​ពឹង​ផ្អែក​លើ​អគ្គិសនី និងកាត់បន្ថយការចំណាយលើការថែទាំ។ 

ក្នុងនាមខ្ញុំជាជនជាតិជប៉ុនម្នាក់ ខ្ញុំក៏មិនច្បាស់ដែរថា ហេតុអ្វីបានជាជនជាតិជប៉ុនចង់ឲ្យល្អឥត​ខ្ចោះ​បែប​នេះ ប៉ុន្តែ​ការ​អភិវឌ្ឍ​នៅ​តែ​បន្ត។

បច្ចេកវិទ្យាបង្គន់នៅប្រទេសជប៉ុនមិនត្រឹមតែផ្តល់ភាពងាយស្រួលប៉ុណ្ណោះទេ ថែមទាំងបង្ហាញពីការយកចិត្តទុកដាក់យ៉ាងល្អិតល្អន់ និងភាពច្នៃប្រឌិតគ្រប់ចំណុច។

មិនថានោះជារបស់របរដែលប្រើប្រចាំថ្ងៃនោះទេ ពួកគេនៅតែបន្តកែលម្អជានិច្ច ដើម្បីសម្រេចបាននូវកម្រិតដែលល្អឥតខ្ចោះបំផុត។

នៅប្រទេសជប៉ុន ការរៀនក្បាច់ដាវត្រូវបានគេហៅថា Kendo (ក្បាច់ដាវ) រីឯហាត់អក្សរគេហៅ​ថា Shodo (សិល្បៈ​នៃ​ការ​សរសេរ​អក្សរ​ជប៉ុន) ។

ក្នុងនោះអក្សរ (道) មានន័យថា ផ្លូវឆ្ពោះទៅរកភាពល្អឥតខ្ចោះ។

ដូច្នេះ តើ​ខ្ញុំ​អាច​ហៅ​ថា “ផ្លូវ​នៃ​បង្គន់” បានដែរ​ទេ?

Abe Kengo