មូល​ហេតុ​ដែល​ប្រជាជន​ជប៉ុន​ចូល​ចិត្ត​អាហារសមុទ្រ

ពេល​និយាយ​ពី​ម្ហូប​ជប៉ុន មុខ​ម្ហូប​ដែល​ពិសេស​មាន​ដូចជា Sushi, Sashimi, Tempura -ល-។

មុខ​ម្ហូ​ប​ទាំង​នេះ​ភាគ​ច្រើន​ជា​អាហារ​​សមុទ្រ​។ គ្រប់គ្នាយល់ថា ដោយ​សារ​តែជប៉ុន​ជាប្រទេសកោះ ហើយ​ត្រូវ​ហ៊ុំ​ព័ទ្ធ​ជុំ​វិញ​ដោយ​មហា​សមុទ្រ ហេតុ​នេះ​ប្រភព​អាហារ​ភាគ​ច្រើន​មក​ពី​សមុទ្រ។ កាលពី​មុន​ខ្ញុំ​ក៏​គិត​បែប​នេះដែរ ប៉ុន្តែ​មូលហេតុពិតប្រាកដគឺ​មិន​​មែនដូច្នេះនោះទេ។

រូបភាព https://mag.japaaan.com/archives/86126

ជាដំ​បូង Sashimi កាន់​តែ​ពេញ​និយម​ខ្លាំង​នៅ​ប្រទេស​ជប៉ុន មិន​មែន​ដោយ​សារ​ប្រជាជន​ជប៉ុន​ចូល​ចិត្ត​​ហូប​នោះ​ទេ ប៉ុន្តែ​មក​​ពី​ការ​ចម្អិន​របស់​ចុង​ភៅ​ផង​ដែរ។

ដើម្បី​ហាន់ Sashimi ដោយរក្សា​នូវ​រស​ជាតិ ចុង​ភៅ​ត្រូវ​ប្រើ​កាំ​បិតមុត ដែល​ត្រូវ​ធ្វើ​ឡើង​យ៉ាង​ពិសេសដូចជា​ដាវ​ជប៉ុន​ (ប្រភេទ​ដាវ​ដែល​ Samurai ប្រើ​កាល​ពី​សម័យ​បុរាណ)។ ក្រោ​យ​មក​ ភ្ញៀវ​មិន​ត្រឹម​តែ​មក​ហូបប៉ុណ្ណោះទេ ​ថែម​ទាំង​​បាន​​ទស្សនា​​ដំ​ណាក់​កាលចម្អិន ដែល​នាំ​មក​នូវ​ភាពទាក់ទាញបន្ថែម​សម្រាប់​មុខ​ម្ហូប។ ដោយ​សារ​តែ​ស្នាដៃ​ធ្វើ​ម្ហូប​នេះធ្វើ​ឲ្យ​ Sashimi កាន់​តែ​ពេញ​និយម​។

ឧទាហរណ៍​ត្រី 鯛 (tai) សម្លេង​ដូច Omedetai មាន​ន័យ​ថា “គួរ​ឲ្យ​ជូន​ពរ” ហេតុ​ដូច្នេះ​វា​​បាន​ក្លាយ​ទៅជា​មុខ​ម្ហូប ប្រើ​ដើម្បី​ជូន​ពរ​ពេល​ដែល​មាន​រឿង​ល្អ។

រូបភាព https://mag.japaaan.com/archives/86126

ប៉ុន្តែ​ហេតុ​អ្វី​ពេល​ដែល​ចម្អិន​ត្រី Tai បែរជា​អាំងតែមិន​ធ្វើ​ជា Sashimi? តាម​ការ​ពិត​វិធី​អាំង​ត្រីក៏​មាន​អត្ថន័យដែរ។ ក្រោយ​ពេល​អាំង ក្បាល​ត្រី​ដាក់​នៅ​ខាង​ឆ្វេង។ អ្នក​ដែល​បរិភោគ ត្រូវហូបពី​ឆ្វេង​ទៅ​ស្តាំ ហើយហូប​ត្រី​ទាំង​មូល អ្វី​ទាំង​នេះ​មាន​អត្ថន័យថា​ “ព្យាយាម​ធ្វើ​រឿង​មួយ​ដល់​ទី​បញ្ចប់”។ បើ​ធ្វើ​ទៅ​ជា ​Sashimi ត្រី​នឹង​មិន​អាច​រក្សាសភាព​ដើម​ ធ្វើ​ឲ្យ​បាត់​នូវ​អត្ថន័យនេះ ។

តើ​អ្នក​ដឹង​ពី​ប្រភេទអាហារ​មួយ​នេះដែរទេ?

រូបភាព https://mag.japaaan.com/archives/86126

មុខ​ម្ហូប​នេះ​មាន​ឈ្មោះ​ថា 鰹節 (Katsuobushi)។

Katsuobushi ត្រូវ​បាន​ធ្វើ​ដោយ​វិធី​ហាល​ស្ងួត​កាត់​ត្រី​ Katsuo ជាចំ​ណិតតូចៗ។ ឈ្មោះត្រី Katsuo ក្រៅ​ពី​វិធី​សរសេរ​ដូច​ខាង​លើ អាច​សរសេរ​ថា 勝男 (បុរសទទួល​​ជ័យ​ជំ​នះ) នាំ​មក​នូវ​អារម្មណ៍​នៃ​មនុស្ស​ដែល​មាន​កម្លាំង។ នេះ​ជា​មុខ​​ម្ហូប​ប្រើ​ដើម្បី​ជូន​ពរគ្រួ​សារ​ដែល​ទើប​តែ​មាន​កូន​ប្រុស។

ក្រៅ​ពី​នេះ​ នៅ​មាន​មុខ​ម្ហូប​មួយ​ចំ​នួនទៀត ​ដែល​មាន​របៀប​អាន​ស្រដៀង​ពាក្យ​វិជ្ជ​មាន​ក្នុង​ភាសាជប៉ុន។ ឧទាហរណ៍ 昆布​ (Konbu) អាន​ដូចពាក្យ Yorokobu (សប្បាយរីក​រាយ) ឬ Tako (មឹកធំ) បញ្ចេញ​សម្លេង​ដូច​​នឹង​ 多幸 (សុភមង្គល​ដ៏​ធំ)។

ប្រទេសជប៉ុន​ជា​ប្រទេស​ដែល​មាន​វប្បធម៌​ម្ហូប​អាហារ​សមុទ្រ ហេតុ​នេះ​ហើយ​ទើប​មា​ន​ម្ហូប​ Sushi, Sashimi ស្រស់​ឆ្ងាញ់​សម្រាប់​យើង​បរិភោគមែន​ទេ?

Abe Kengo