Furisode សម្លៀកបំពាក់លើក​តម្កើន​កិត្តិយស និង​សម្រស់​នារី​ជប៉ុន

យើង​ដឹង​ថា Kimono ជាសំលៀកបំពាក់ប្រពៃណីរបស់ជប៉ុន។ តើអ្នកដឹងទេថា Kimono មានច្រើនប្រភេទ ហើយ​ឈ្មោះ​​ហៅ​ខុស​គ្នា សម្រាប់​​​ពាក់​នៅ​ក្នុង​ឳកាស​ផ្សេង​ៗ​គ្នា​។

ឧទាហរណ៍ Yukata គឺជាប្រភេទសម្លៀកបំពាក់ស្តើងស្រាលជាង Kimono។ តាម​ពិត Yukata ជាសម្លៀកបំ​ពាក់​គេង​នៅ​ហាង​ស្រា ទោះ​បីជា​យ៉ាង​ណា​នារីជប៉ុនពាក់ Yukata ទៅមើលកាំជ្រួចនៅក្នុងពិធីបុណ្យនៃរដូវក្តៅ។ ក្រៅពី​នេះក្នុង​ចំណោម​ Kimono ដែល​មានអត្ថន័យសំខាន់គឺ Furisode ជាសម្លៀក​បំពាក់ត្រូវពាក់នៅថ្ងៃធ្វើពិធី​ពេញវ័យ។

ពាក្យ Kanji នៃ Furisode (振袖) មានន័យថាដៃអាវយោល​ ជាការ​ពណ៌នាអំពីប្រភេទសម្លៀក​បំ​ពាក់​នេះ។ Kimono បែប​ប្រពៃណីមាន​ដៃ​អាវ​វែងហើយធំ ប្រវែងដៃអាវគឺអាស្រ័យលើប្រភេទ Furisode។

ប្រវត្តិសាស្ត្រ និងអត្ថន័យ

ពីមុនកូន​គ្រួសារអភិជនជាអ្នក​ពាក់​សម្លៀក​បំ​ពាក់ Furisode។ កូន​ប្រុស​ស្លៀក Furisode រហូត​ដល់​អាយុ ១៨ ឆ្នាំចំណែក​កូន​ស្រី​ពាក់​រហូត​ដល់​យក​ប្តី។

សព្វ​ថ្ងៃពេលដែល​នារី​ជប៉ុន​ពាក់ Furisode មាន​ន័យ​ថានាង​ដល់​អាយុ​អាចរៀប​ការ​។ នេះជា​អំណោយ​ដ៏​មាន​តម្លៃសម្រាប់​នារី​ជប៉ុន​ដល់​អាយុ​ពេញ​វ័យ ទោះបីជាស្ត្រីភាគច្រើនជួល Furisode ដើម្បី​ស្លៀកព្រោះ​តែវាមានតម្លៃ​​ថ្លៃ។ ហើយ​ស្រ្តី​ជប៉ុន​នឹង​មិន​ស្លៀក Furisode លើស​ពី​អាយុ ៣០ ឆ្នាំ ពីព្រោះនោះគឺជាអាយុរបស់ស្ត្រីដែលរៀបការហើយ។ ទោះ​មិន​ទាន់​យក​ប្តី​នៅ​អាយុ ៣០​ ឆ្នាំក៏​គេ​មិន​ស្លៀក​ Furisode ដែរ។

ម៉ូត​សម្លៀក​បំ​ពាក់

ម៉ូត​សម្លៀក​បំ​ពាក់ Furisode ផ្លាស់​ប្តូរ​ជារៀង​រាល់​ឆ្នាំ តាម​សម័យ​កាល ការ​រចនា​ម៉ូតដើម្បី​លើក​តម្កើនយុវវ័យ និង​សម្រស់​នៃ​នារី​។ ដូច្នេះសម្លៀក​បំ​ពាក់​មាន​ពណ៌ស្រស់​ឆើត​ឆាយ​ ​និង​សុភាពរាបសា។ គេ​​ចែក Furisode ជាច្រើន​ប្រភេទ​ដូចជា Ofurisode, Chufurisode និង Kofurisode។

រូបភាព girlschannel.net

Ofurisode (Furisode ប្រភេទ​ធំ) មាន​ប្រវែងដៃអាវ 41 inch។ នេះជាប្រភេទ Furisode ថ្លៃថ្នូរ​ ហើយ​វែង​ ពេល​ស្លៀក​ពិបាក​ធ្វើ​ដំ​ណើរ​ណាស់។ ពីមុន​នៅ​ក្នុង​គ្រួសារអ្នក​មាននិមិត្តសញ្ញាគ្រួសារត្រូវបានប៉ាក់លើ Furisode។

Chufurisode (Furisode) ជា​ប្រភេទ​មធ្យមមាន​ប្រវែង​ដៃ​អាវប្រហែល 35,4 inch ហើយមានអត្ត​ន័យមិនសូវសំខាន់ជាង Ofurisode ទេ។ នេះក៏​ជា Furisode ពេញ​និយមដែរ។

ចុង​ក្រោយ​គឺ Kofurisode ជាប្រភេទដែលមានដៃអាវខ្លីបំផុត ភាគ​ច្រើន​ពាក់​ជាមួយ Hakama។

រូបភាព ET Fashion – ETtoday

សូម​មើល​សម្លៀក​បំ​ពាក់ Furisode តាម​សម័យ​កាលនៃប្រទេសជប៉ុន តាមរយៈការសម្តែងរបស់តារា Hamabe Minami។

Furisode អាច​ពាក់​នៅ​ពេល​​ណា?

Furisode ពាក់​នៅ​ក្នុង​ឳកាស​ពិសេស ពេញនិយម​​បំ​ផុត​គឺ Seijin no hi (ពិធី​បុណ្យ​ពេញ​វ័យ) ត្រូវបានធ្វើឡើងនៅថ្ងៃទីពីរនៃខែមករា ដើម្បីផ្តល់កិត្តិយសដល់នារីដែលផុតអាយុ ២០ ឆ្នាំ។ បន្ទាប់ពីពិធីនេះនារីត្រូវបានផ្តល់សិទ្ធិបោះឆ្នោត អាច​ជក់​បារី ឬ​ផឹក​ស្រាប្រសិន​បើ​ចង់។

ក្រៅពី​នេះ Furisode អាច​ពាក់​ក្នុង​ពិធី​រៀបអាពាហ៍​ពិពាហ៍ ឆ្នាំ​ថ្មី -ល-។

តើ​សុភាព​នារី​ចង់​ស្លៀក​សម្លៀក​បំ​ពាក់​ Furisode នេះដែរឬទេ?

Chee